اخي مابعرف كيف اعمل اقتباس لاني مابشارك كتير بالمنتديات لذلك اعذر مشاركاتي اذا كانت طويلة بس ان شاء الله بعون الرب رح ارد عكل نقاطك

بالنسبة للنقطة الاولى انو
وهل هذه صفات إله يا (مؤمن) ؟؟؟؟؟
سيادتك بتقارن (نبى) بـ (إله) ؟؟؟؟
إذن أرجو أن تضع لى أوجه الشبه والخلاف بين التفاحة والمحيط الأطلسى !!!!!!

قبل مانحكي عن السيد المسيح له كل المجد لازم نعرف انو هو الو طبيعتين طبيعة بشرية ناسوت انسان متلي ومتلك ومتل اي واحد بياكل وبيشرب وبينام وكل شي انسان عادي لكن من غير خطيئة طاهر من الخطايا هو الانسان الوحيد يلي بدون خطية وبعدين رح نحكي عن موضوع انو بدون خطية بحوار منفرد
الطبيعة التانية طبيعة الهية لاهوت الله تجسد بهاد الجسد واتحد اللاهوت بالناسوت بدون ما ينمزج ويتكون طبيعة جديدة
يعني اضربلك مثال .. قضيب حديد سخنو عالنار بيحما كتير وبيتحد مع النار بس مابتتغير خواص الحديد والنار النار بضل نار والحديد بضل حديد لكن متحدات مع بعض

طبعا القصة باختصار شديد بلشت من خطيئة ادم لما اكل من شجرة معرفة الخير والشر وقبل ما ياكل الله من كل شجر الجنة بتاكل الا شجرة معرفة الخير والشر اذا اكلت منها موتا تموت لكن ادم عصا واكل من الشجرة وانكتب عليه الموت ودخل الموت ودخلت الخطيئة
والموت انواع الموت الجسدي والموت بالخزي والعار بسبب الخطيئة والموت بانفصالك عن الله بسبب الخطيئة
والهلاك الابدي الي هو المصير الابدي بالهاوية
وبالفعل انكتب على ادم وذريتو هاد الحكم بسبب الخطيئة
والله اصدر حكمو
ونحنا بنعرف انو صفات الله عز وجل مطلقة
يعني هو عادل مابتراجع عن قرار اتخذو
بس بنفس الوقت هو رحيم خلقنا وبحبنا وبرحمنا مابتركنا نروح عالهاوية وعالهلاك الابدي
عدلو ورحمتو متل كفين ميزان .... لذلك اوجد خطة الهية محكمة جدا تتناسب مع العدل والرحمة لفداء هاي الخطيئة والعودة لله
وهاي الخطة هي السيد المسيح له كل المجد
احنا بنعرف انو الله غير محدود ولا ينتهي يعني مالا نهاية
وخطية وحدة بحق الله غير المحدود يساوي مالانهاية من الخطية
شو الشي الي مالا نهاية الي رح يكفر خطية مالا نهاية ؟
هو الله لانو بس هو الشي الي مابنتهي
وهاد الشرط الاول من شروط الفادي انو يكون غير محدود
وكلنا بنعرف انو يلي عمل الخطيئة ادم بشر لذلك والفدية لازم تكون من قيمة البشر يعني بشر .. اوضحلك بمثال بسيط
صديقك عندو سيارة رولزرويس اخر موديل واغلا شي وحكيتلو بيوم بدي اخدها منك واروح مشوار وبرجعها وهو اعطاك ياها وانت سايقها عملت حادث وتدمرت السيارة
بهاي الحالة لازم تعوض صاحب السيارة هل بتعوضو بسيارة رخيصة قديمة؟ قطعا لا لانها مش من نفس قيمتها هو مارح يقبل ... اذا لازم تجبلو نفسها السيارة او تعوضو بقيمتها وكذلك الفدية لازم تكون بشر من نفس قيمتو لانو هو اسما المخلوقات مابصير تفديه بجاجة
هل قيمة البشر نفس الجاجة قطعا لا
وهاد الشرط التاني من شروط الفادي
والشرط التالت للفادي انو يكون من غير خطية طاهر من الخطايا والذنوب لانو لو كان في خطية وفي ذنوب كان بلزمو فادي يفديه بس لما هو طاهر من غير خطايا بامكانو انو يفدي
هاي الصفات كلها اجتمعت بالسيد المسيح له كل المجد جاء لكي يتالم على الصليب ويموت ويقوم من الاموات
يعني باختصار الله بدو يكفر عنا الخطيئة والتكفير بتم بانو يموت شي طاهر نيابة عن المذنب مساوي له بالقيمة
لكن الله لايموت لذلك اتخذ جسد طاهر وكملت الشروط
غير محدود وبشر وطاهر ( لاهوت وناسوت وطاهر من الخطايا )
ومات على الصليب والله المتجسد فيه لايموت طبعا لكن بالتجسد اعطاه قيمة غير محدودة عشان يكفر عن خطية بحق الله الغير محدود

برجع للنقطة انو السيد المسيح الو طبيعتين لاهوت وناسوت
ولما موسى يحكي مثلي بقصد عن ناسوتو يعني عن طبيعتو البشرية لكنها تختلف عن كل البشرية بنها طاهرة من غير خطيئة
يعني الخطيئة دخلت العالم بادم وبالمسيح له كل المجد تم التكفير عن الخطيئة
والدليل على صحة ذلك
الآية رقم/37 من سورة البقرة ، فقال تعالى : ( فَتَلَقَّى آدَمُ مِنْ رَبِّهِ كَلِمَاتٍ فَتَابَ عَلَيْهِ إِنَّهُ هُوَ التَّوَّابُ الرَّحِيمُ )
بعد ماطرد ادم من الجنة استغفر وتاب والله غفرلو وتاب عليه .... لكن السؤال ليش مارجعو عالجنة طيب مهو غفرلو وتاب عليه بس ليش مارجع عالجنة؟؟؟؟؟؟
هاد بالنسبة لتعقيبك الاول