ممكن يكون الموضوع غريب شوية بس انا عايز اعرف رأيكم بجد واللى بيحصل دلوقتى دا طبيعى ولا فى حاجة غلط


الموضوع بخصوص الحالة الجوية فى مصر

اولا انا لاحظت اختفاء فصلى الربيع والخريف تماماااا

يعنى الواحد يبقى قاعد فى بيته قدام الدفاية (ولو مفيش يولع الفرن ويقعد قدامه)
تانى يوم يصحى مش طايق نفسه من الحر ومشغل التكييف والمراوح وينزل الشارع مش طايق نفسه بيتخانق مع دبان وشه


والاغرب من كده ان اختلاف الفصول بقى فى اليوم الواحد ,

يعنى مثلا من كام اسبوع صحيت الساعة 8 الصبح عشان اروح معرض الكتاب طلعت البلكونة اجيب الشراب من على الحبل بتاع الجيران , لقيت الجو تلج تلج تلج , قلت اعمل الاحتياطات اللازمة وخدت كل الهدوم اللى على الحبل (بتاع جيرانا برضه ) ولبستها ونزلت

الناس كلها كانت عامله زى ما تكون بتشرب شيشة من بخار الميه لدرجة انك متعرفش تميز الى بيشرب سجابر فيهم ,

وعلى الساعة 12 الضهر كدا حسيت زى ما كون فرخة مسلوقة فى حلة ميه مغلية درجة حرارتها 7000 درجة فهرس هايت , مبقتش عارف اعمل ايه حاولت اشرب اى حاجة ساقعة الاقيها فى سكتى وايس كريم وافضل قاعد فى القاعات اطول وقت ممكن

خلصت على الساعة 5 كده ونزلت وسط البلد وعلى الساعة 8 بالليل الجو رجع تلج واسقع من الصبح وبرغم كل الهدوم اللى كنت لابسها كنت برتعش من البرد


طبعا انا رجعت اليوم دا عندى هبوط وضربة شمس وانفلونزا ودرجة حرارتى تانى يوم كانت داخلة على 40
كل دا مش مهم المهم ان حسيت انى هايجيلى انهيار عصبى او جنان رسمى او هطل موسمى


والاغرب من دا كله ان من يومين كدا اقسم بالله ان الساعة 12 الضهر كان الجو تلج جداااا وبعد 5 دقايق الجو قلب حر مووووت والشمس حاميييييية وبعد 5 دقايق تانية الجو رجع تلج تانى

انا عايز اعرف انا بخرف ولا ايه !!!!!!!!

واضح ان خرم الاوزون وسع اوى - ربنا يستر - .