السلام عليكم ورحمة الله وبركاته

اولا لكل من اختلف معى بالراى كل الاحترام والتقدير
ثانيا الاختلاف فى الراى لا يفسد للود قضية لكن الاخ اللى حكم ببطلان صلاتى 40 يوم اقوله انت مش ربنا ربنا وحده هو اللى بيقبل او ميقبلش متخليش تعصبك لراى يكرهك فى كل اللى يخالفك
ثالثا انت سالتنى عن ميزة واحدة للراجل ده
اقوللك انا اكتر واحدة انظلمت فى عهد حسنى مبارك لانى خريجة حقوق بتقدير جيد مرتفع ومعايا دبلومة دراسات عليا فى القانون بتقدير جيد جدا ولما قدمت فى النيابة الادارية ناس اقل منى خدوا مكانى علشان الواسطة ولحد دلوقتى ملقتش اى وظيفة ليا

انا مش بنفى ان فيه حاجات وحشة ومساوىء كتييييييييييرة لحكمه لكن انا اتربيت لما اشوف حاجات وحشة من حد مهما كانت كتيرة منكرش ابدا حاجة واحدة حلوة عملها فحياته
الراجل ده انا اتعلمت فى عهده فى حين كان ممكن ميبقاليش فرصة فى التعليم
الراجل ده النا بينتقدوه من سنين فالصحافة ولسة موجودين لدلوقتى مصابهمش حاجة
الراجل ده فى يوم من الايام راح وحارب وكان مستعد يموت واحنا علشان عشنا فى السلام منعرفش معنى الحرب لو عاوزين تعرفوه امشوا على ارض سينا وحسوا بالرهبة هناك
الراجل ده عمل حضارة لمصر انتوا مش شايفينها عشان بتكرهوه
الراجل ده عفى مصر من كذه حرب كان اى واحد مكانه كان هيدخلنا فيها مليون فى المية
الراجل ده لما هيمشى اقسم بالله هتعرفوا قيمته
الراجل ده وحش فى حاجات كتيرة وحلو برده فى حاجات تانية احنا هنقف بين ادين ربنا بلاش ننكر كل شىء

وفى النهاية انا بكرر انى واحدة من اللى اتظلموا فى عهده ومليش معاه اى مصلحة بس مبحبش انسى الحلو زى ما انا بفتكر الوحش

وارجع واقول طب انتوا عاوزينه يمشى
الراجل طلع وفوض النائب بتاعه فى الحكم
وعمل اللجنة وحدد المواد اللى حارقة دمنا كلنا فى الدستور
بمعنى انه بقى رئيس شكلى لا اكثر دلوقتى
والجيش طلع يضمن تنفيذ الحاجات دى
الناس دول لسوة واقفين فى التحيرير ليه ماهو عمليا مشى من السلطة وبلا رجعة
ليه بقى لسة واقفين الناس دول نجحوا فى اللى طلعوا عشانه ما يحافظوا على نجاحهم ويروحوا بقى هما معرفوش ان قواعد امريكا اللى فى البحر المتوسط بدات تستعد
هما عاوزين امريكا تقول انا جاية اساعدكم؟
ياجماعة بفضل الشباب دول حاجات كتيرة اوى اتغيرت سيبونا بقى نستمتع بقى بالحاجات دى واهدوا بقى اللى انتوا عاوزينه حصل وخلاص ولا رجعة فيه اهدوا بقى

يارب بحق جاه النبى اكفينا شر تدخل اى قوة م نبرة عشان يومها الواحد يموت حسرة بجد
يارب مصر تهدى بقى
يارب مصر بلد الامان رجعلنا النعمة دى علشان اطفالنا دول يهدوا من الزعر اللى عاشوه

مرة تانية
ارجو محدش يزعل منى دى وجهة نظر شخصية مش بفرضها على حد
كل واحد حر يحس باللى يحس بيه
وكلنا بنحب مصر وبندعيلها من قلوبنا تستقر وتهدى وتبدا تشد حيلها من تانى
انا من يوم ما اتولدت وليوم ماهموت وتحت ظل اى حكم مين من كان هفتخر انى مصرية من جلدى حتى النخاع
اللهم جمع المصرين على قلب رجل واحد ووحد صفوفهم واهديهم لما فيه الخير واكفنا يارب العالمين شر الفتن واكفنا شر المتربصين اللهم صد كيدهم عنا يارب العالمين