يوميات عم رمضان
خلى بالك من مراتك
الشيخ حسن
إنتِ جيتَ ياحلاوتهم ؟
حلاوتهم
أيوه جيت
الشيخ حسن
عَوقتّى ليه ؟
حلاوتهم
لا عوقّت ولا حاجة إنتَ عاوزنى أطير وانا ماشية
الشيخ حسن
إنا باتخض عليك ياحلاوتهم لما تغيبى حبة والدنيا ليل
حلاوتهم
أغيب إيه ياراجل ده مسافة السكة لا رحت هنا ولا هنا
الشيخ حسن
الأول كنتِ زى الرهوان المشوار كنتِ تخديه صد رد فى ثوانى
حلاوتهم
السن ياحبيبى خلاص كبرت مابقتش زى الأول مش زيك واكل شارب نايم مرتاح وسايب الحمل كله عليا
الشيخ حسن
زعلانة ياحلاوتهم علشان سئلتك
حلاوتهم
ماانت بتحاسبنى بالثانية تقولش حيخطفونى
الشيخ حسن
يابت خايف عليكِ الحال مابقاش زى الأول
حلاوتهم
لأ إطمن ماحدش يقدر يهّوب ناحيتى
الشيخ حسن
طيب قوليلى عملتى إيه عند البت فلورا الخياطة
حلاوتهم
قطيعة تقطعها
الشيخ حسن
حصل إيه ؟
حلاوتهم
قعدت أخبط على باب الدار لحد إيديا ما وجعتنى وفين وفين لما فتحتلى الباب بعد ماكنت خلاص حاامشى وكان وشها أصفر بس بعد ما شافتنى ردت الدموية فى وشها ولما شافت حتة القماش فى إيدى قالتلى ممكن تيجى بكرة علشان مش فاضية وورايا حاجات كتير قلتلها ماأقدرش إجيلك تانى إنتِ خدى مقاسى دلوقت وابقى خيطى الفستان على مهلك قالتلى طيب خليكى هنا وانا ثوانى أدخل أجيب المازورة من جوه وآجى آخد مقاسك قلتلها يالهوى تاخدى مقاسى كده قدام إللى رايح وإللى جاى ، شفت البت يا شيخ حسن عاوزة تسيبنى واقفة على باب الدار وتدخل تجيب المازورة من جوه
الشيخ حسن
عجيبة وبعدين ياحلاوتهم ؟
حلاوتهم
لما لقتنى مصممة إنها تاخد مقاسى جوه راحت مدخلانى الدار وقالتلى طيب حاخد مقاسك دلوقت بسرعة بس التفصيل بعدين علشان ورايا شغل وأخدتنى فى اوضة الفرن إللى جنب الباب
بس ياشيخ حسن أول ما دخلت لقيت صوت واحد بيقول إنت فين ياراجل يا خروف ، كده برضو يا جرجس تخلينى قاعد منتظرك بقالى ساعة واكتر
قلتلها سامحينى يافلورا ماكنتش أعرف إن عندك ضيوف
قالت ده أبونا مستنى جرجس لما يرجع
بصيت يا شيخ حسن جوه الدار لقيت واحد أسيس فى سن جوزها قاعد براحته خالص ومفشخ فوق الكنبة
البت فلورا قالت بصوت عالى أمان أمان دى واحدة جارتنا يابونا جاية علشان أخيطلها فستان حاخد مقاسها دلوقت وحتمشى علطول
قلتلها تصدقى يافلورا إفتكرته أخو جوزك
قالتلى جرجس نزل مصرعلشان يجيبلى كُلّف للفساتين وحيجى بكرة قلتلها هو يااختى الأسيس حيستنى جوزك هنا لحد ما يجى بكرة ؟
قالتلى لأ أبونا شوية وماشى بعد ما يخلص مصلحته
قلتلها هو جاى يخيط فستان قالتلى لأ ده جاى لجرجس
أتارى يا شيخ حسن الراجل الأسيس ده لما انا خبطت على الباب والبت فلورا فتحتلى إفتكر إنى جوزها....
الشيخ حسن
أنا فاهم الحاجات دى كويس ياحلاوتهم
حلاوتهم
طيب إعمل معروف ياشيخ حسن ماتقولش لحد علشان مفيش حد يعرف الحكاية دى غيرى
الشيخ حسن
ماتخافيش إللى بيزمر مابيخبيش دقنه
والعالم دى مابتختشيش
الواد جرجس الموكوس قلتله كذا مرة خلى بالك من مراتك ما سمعش كلامى
حلاوتهم
يمكن عاجبه كده هو حر
الشيخ حسن
ده انا قلتله بالمفتشر
فيه حد يجيب الديب لغاية داره ويسيبه مع النعجة بتاعته
بس الظاهر الناس دى مهما تكلميهم ودن من طين وودن من عجين
هه لما أقوم أروح عند الشيخ رمضان
هاتيلى الجبة والقفطان والعصايا
حلاوتهم
إوعى يا شيخ حسن
الشيخ حسن
يابت ما تخافيش
حلاوتهم
طيب إبقى تقل هدومك أحسن الجو بره برد
الشيخ حسن
خلاص ياحلاوتهم هاتيلى الكوفية الصوف بتاعة أبويا الله يرحمه
حلاوتهم
هى حيلتك غيرها ده لونها راح واتقطعّت
الشيخ حسن
دى بركة من ريحة أبويا
فوتك بعافية
هه توكلت على الله
*
*
الشيخ حسن
ياشيخ رمضان ياشيخ رمضان
إنتَ نمت ولا إيه
عم رمضان
إتفضل يا شيخ حسن
هو فيه حد بينام من دلوقت
الشيخ حسن
أنا كمان قلت إيه
أصل مش من عادتك تنام بدرى
عم رمضان
إيه إللى أخرك ؟
الشيخ حسن
حلاوتهم كانت عند البت فلورا الخياطة علشان تفصل لها فستان وده إللى أخرنى
عم رمضان
مبروك ياعم على الفستان
أيوه كده خلى حلاوتهم ترضى عنك
الشيخ حسن
دى جت من عندها مولعة
عم رمضان
ليه كفاالله الشر
المتابع يقول متابع حتى نستكمل اليومية بمشيئة الله
المفضلات