سنوات مع رذالة الناس
مذكرات أبو ظريفـة
و
سنوات مع رذالة الناس
( 1 )
صفافير وتصفيق وزغاريد وهتافات
خلاص هدوء هدوء
واحدة بتسئل وبتقول إبنى ياسيدنا شقى جدآ ومحتاجة دعواتك من أجل ما يهدا
أبو ظريفة : الشقاوة دى شيىء طبيعى فى الأولاد وكلنا كنا كده واحنا صغيرين وياما إتشاقينا وياما لعبنا عسكروحراميه
والنطة وإللي يحصلنى يكثرنى إللي كنت باحبها جداً
هيء هيء هيء
( تصفيق وزغاريد ) ثم لحظات صمت
واحدة بتسئل وبتقول جوزى ياسيدنا كتير بيبات بره البيت وكتير ما بنشوفش بعض
أبو ظريفة : لو بيبات بره البيت ومابتشوفوش بعض أنصحك انت كمان تباتى بره البيت زيه ولما انتوا الاتنين تباتوا بره البيت مسيركوا حتتقابلوا بره مع بعض وتشوفوا بعض ! هيء هيء هيء
( تصفيق وزغاريد ) ثم لحظات صمت
واحدة تانية بتسئل وبتقول جوزى ياسيدنا ما بيسمعش كلامي وكل ما أكلمه يقوللي ملكيش دعوة
أبو ظريفة : خلاص إبقى تعالى الكنيسة واحنا نديكى دعوة !!
هيء هيء هيء
( تصفيق وزغاريد ) ثم لحظات صمت
المرة دى واحد بيسئل وبيقول مراتى ياسيدنا كل شوية عند امها ومابتقعدش فى البيت إلا يومين بس وبقية الاسبوع عند امها
أبو ظريفة : خلاص هات حماتك عندك فى البيت وبكده تضمن وجود مراتك فى البيت الاسبوع كله ولما تحس إنك خلاص مش قادر تستحمل حماتك سيب ليهم البيت وروح إقعد مع حماك
هيء هيء هيء
( تصفيق وزغاريد ) ثم لحظات صمت
واحد بيقول البنات ياسيدنا بيلبسوا يا إما قصير أوى ياإما محذق أوى وهما داخلين الكنيسة
أبو ظريفة : طيب وانت تبص عليهم ليه ؟
فين الخشبة إللي فى عينك ؟
وأنا بطلب من كل أم تكون قدوة لبناتها وبلاش هى تلبس قصير علشان البنات ما تقلدهاش
وبقول للشباب إللي بيكون واقف يصلي وبعدين يعمل ان فيه حاجة وقعت منه ويوطى علشان يدور عليها وهو فى الحقيقة قاصد انه يبص على البنات من تحت أو يصورها بتليفونه أقوله بص لمستقبلك أحسن بدل ما تبص لحاجة تانية .
هيء هيء هيء
( تصفير وزغاريد )
وبقول للبنت إللي بتلبس قصير وتحاول تجذب إليها نظر الشباب أأقوللها إنت بتنفخى فى قربة مقطوعة
هيءهيء هىء
( تصفيق وزغاريد ) ثم لحظات صمت
واحدة بتسئل :وبتقول جوزى عنده العنّة وعاوزة تصريح بالطلاق
أبو ظريفة : الزواج شركة بين الرجل والمرأة ومفيش حد يقول انا عندى من دون الآخر وأى ممتلكات لطرف قبل الزواج بعد الزواج بتصير شركة وملك للطرفين وجوزك لو عنده العنة انت شريكته فيها يعنى ملكيتها ليكم انتم الاتنين بالتساوى ، ومفيش طلاق فى المسيحية . الأول تطلع إيه العنة دى ؟
( تصفيق وزغاريد ) ثم لحظات صمت
واحدة بتسئل وبتقول ابنى يا سيدنا بيشم وغلبت معاه ومفيش فايدة
أبو ظريفة : هو فيه حد ما بيشمش ؟ هىء هىء هىء
ماكلنا بنشم وحاسة الشم شيىء طبيعى عند الانسان والحيوان
دى كاتبة بعد كدة إنه بيشم كوكاين وبيضربنا علشان نديله فلوس يروح يشترى بيها
أبو ظريفة : طيب ما تقولي كده من الأول هو انا بشم على ضهر إيدى علشان أعرف انت بتقصدى إيه ؟ هيءهيء هيء
( زغاريد وتصفيق ) ثم لحظات صمت
لو عاوزاه ما يشمش إتبرعوا بفلوسكم كلها للكنيسة وبكده تكونوا على الحديدة ومش حيكون حيلتكوا فلوس علشان يضربكم ويخدها منكم
( تصفيق وزغاريد ) ثم لحظات صمت
واحد بيسئل وبيقول ينفع أعطى العشور لقرايبى لأنهم فقراء وغلابة
أبو ظريفة : لو احنا وافقنا إنك تعطى العشور لقرايبك قرايبك حيرجعولك العشور تانى وكأنك ما عملتش حاجة وضحكت على الكنيسة
إنما لما تعطىى العشور للكنيسة انت مش حتشوفها تانى لآ انت ولآ قرايبك وتكون الكنيسة هى إللي ضحكت عليك هيء هيء هيء
واحدة بتسئل : بتقول احنا متجوزين من فترة ومخلفناش والدكاترة قالوا مش حينفع نخلف إلأ عن طريق أطفال الأنابيب وبتقول احنا معندناش فلوس وبنطلب مساعدة الكنيسة
أبو ظريفة : انا حادرس الطلب بتاعكم وأشوف إيه إللي نقدر نعمله حتى لو رسيت على ان الكنيسة تتحمل تمن الأنبوبة وانتوا تتحملوا تكاليف العملية
هيء هيء هيء
( تصفيق وزغاريد ) ثم لحظات صمت
واحدة تانية بتسئل وتقول : أنا بحب ربنا يسوع جدآ بس مش بحب أصلي
أبو ظريفة : يعنى بتحبيه مع وقف التنفيذ هيء هيء هيء
ولما تتخطفي علشان تقابليه فوق حتقوليله أنا بحبك بس مخصماك
انت ممكن تصلي صلاة قصيرة وخفيفة وعبارة عن أربع كلمات ومش حتاخد منك ثانية واحدة زى
بابا يسوع خليك معاى هيء هيء هيء
( تصفيق حاد وزغاريد وصفافير ) ثم لحظات صمت
واحد بيسئل وبيقول إنا مريض من خمسة وتلاتين سنة
واترددت كتير على الأطباء بدون جدوى وسمعت عن معجزات الشفاء واستنجدت كتير بالقديسين ومفيش فايدة طيب إيه العمل ؟
أبو ظريفة : وانا بقولك ثق إنه فى يوم من الأيام حتحصلك معجزة شفاء بس انت ماتستعجلش !!
السائل : ياسيدنا أنا بقالي خمسة وتلاتين سنة وتقوللي ما تستعجلش أنا عاوز الكنيسة تشوفلي حل
أبو ظريفة : ابقى سيب اسمك وعنوانك وعلى الله تكون ام النور سمعانا دلوقت
وياريت الأب يوكنس يكتب اسمك علشان لو حد طلبه من القديسين
هىء هىء هىء
( تصفيق حاد وزغاريد ) ثم لحظات صمت
واحدة بتسئل وتقول : فى الأحداث الأخيرة وأعمال البلطجة إللي حصلت جوزى مسك سكينة المطبخ وكان بيرتعش وجمعنا أنا والولاد وإستخبينا تحت السرير بعد ما طفينا النور وعملنا نفسنا مش موجودين حتى اخته لما إتصلت بينا علشان تتطمن علينا كان بيرد عليها وهو بيوطى صوته خالص لدرجة اخته مكنتش سامعة حاجة وبقت تقوله انا مش سامعه انت بتقول إيه علي صوتك شوية قاللها أصل إحنا مش هنا
أبو ظريفة :هيء هيء هيء
( تصفيق وزغاريد وهيصة شديدة )
أبو ظريفة : إستنوا لما أكمل الورقة
وبتقول كل رجالة العمارة والشباب كانوا واقفين تحت فى الشارع ماعدا جوزى فهل يعتبر ده حرام والرب يزعل منا
أبو ظريفة : طيب إيه لازمة إنه يمسك السكينة وهو تحت السرير
هيء هيءهىء
( تصفيق وزغاريد )
الحقيقة ان الرب علمنا إزاى نتصرف فى الظروف إللي زى دى لما قال
فحينئذ ليهرب الذين في اليهودية الى الجبال
و الذي على السطح فلا ينزل لياخذ من بيته شيئا
و الذي في الحقل فلا يرجع الى ورائه لياخذ ثياب
فهروبكم تحت السرير يفرح الرب ومايزعلوش
( تصفير وزغاريد وتصفيق ) ثم لحظات صمت
واحدة سائلة بتشتكى من جوزها وبتقول أنا خلاص مش طايقة ريحته هيء هيء هيء ( تصفيق جامد وزغاريد )
وبتقول إنه فين وفين لما بيستحما
هيء هيء هيء
وكمان بتقول إنها غلبت معاه ومش عارفة تعمل إيه
أبو ظريفة : الحقيقة ان الأغلبية بيعتمدوا على ان تلاميذ الرب ماكنوش بيغسلوا إيديهم لما كانوا يجيوا ياكلوا
وده حقيقى
بس ماننساش ان الزوجات من حقها تشم ريحة كويسة فممكن والكلام للرجالة انتوا تقدروا تستحموا من غير متغسلوا إيديكم
هيء هيء هيء هىء هىء هىء
( تصفيق حاد وصفافير وزغاريد )
رد مع اقتباس
المشاركة الأصلية كتبت بواسطة النصر بالتحقق
المفضلات