قوة التفكير الإيجابي

كلمة سمعتها كتير عن الشعب المصري.. انه شعب ابن نكتة..
شعب اتعلم يضحك على آلامه.. يواجه الأزمات بابتسامة..
و في يوم سرحت في المعنى ده..
ياترى لو الشعب المصري ماكانش قابل كل الأزمات اللي مرت عليه في تاريخه بالروح دي.. كان قدر يعيش؟..

أعتقد كان انقرض من زمان
لولا انه كان بيبص للأزمة.. و يدور على طاقة نور..يدور على نص الكوب المليان.. و يغنيه في حتة زجل عامية بسيطة.. أو يضحك عليه في نكتة.. أو يقول لك "اشتدي يا أزمة تنفرجي"..
لولا كده أعتقد كان فات الضغط و السكر بقوا مرض وراثي في الشعب كله..
بصراحة افتكرت الموضوع ده و انا باتفرج على فيلم Finding Nemo..
الفيلم فيه معاني قوية جداً عن التفكير الإيجابي..
شخصية السمكة "دوري" كانت دايما في قمة الإيجابية بشكل عجيب.. يمكن حتى من المواقف اللي ضحكتني جداً.. لما كانت دوري و مرلين في فم الحوت.. و بدأ الحوت يبلعهم..
مرلين اترعب.. و قال لهاالحوت بيبلعنا!! ..
بصت له دوري و قالت له .."انت متأكد؟" ..
قالها : "أيوة.. منسوب المية في بق الحوت بينقص .. بقه بقى نص فاضي "..
بصت دوري لبق الحوت.. و قالت له :" .. أنا شايفة انه نص مليان !"

أعتقد ده اللي حصل مع الشعب المصري.. و أي شعب تاني مر بأزمات في تاريخه.. انه في وسط الأزمة.. مابيسمحش للأفكار السلبية انها تهزمه..
و لكن بيدور بصدق على طاقة النور اللي أكيد موجودة.. واللي يوم مابيلاقيها.. يوم مابيشوف النص المليان.. بيفضل الأمل ماليه.. بيحفزه و يدفعه الى انه يتحرك و يعمل لتحقيق الأمل اللي جواه..
الزاوية اللي بننظر منها للأمور ليها أثر عميق جداً في حياتنا..
هي اللي بتدي معنى لحياتنا.. بل ممكن تغير حياتنا 180 درجة..
هي دي نفس النظرة اللي تخلي بياع الفول ينادي و هو واقف على عربيته و يقول "معانا اللوز"...
و اللي تخلي بتاع البطيخ ينادي و يقول :"بجنيه و نص يا بقلاوة"..

بعض الناس عندهم فعلا القدرة العجيبة دي على انهم ينظروا دايما للأمور من الزوايا الإيجابية.. عندهم القدرة انهم يعيدوا وضع الأمور في اٌطار اللي يرفع من روحهم المعنوية.. و يحفزهم.. و يدفعهم للعمل.. فبتتحول نظرتهم الإيجابية دي.. إلى طاقة جبارة..
عندهم القدرة انهم ياخدوا موقف كل الناس شايفين انه سلبي.. و يحولوه لموقف ايجابي.. بانهم يوروا للناس زاوية تانية ممكن ينظروا منها للموقف ده..
بالنسبة للناس دول.. نصف الكوب دايما مليان.. مهما كان شكله نصف فارغ بالنسبة لباقي الناس..
من هؤلاء الناس كثيرين جداً.. صنعوا التاريخ..
بل صنعواحياة امتدت بها حياتهم حتى بعد موتهم..
منهم سيد قطب رحمه الله.. شيخ مريض.. مرمي في المعتقل.. يرى من صنوف العذاب أصناف و ألوان..
و لكن المؤمن دايما إيجابي..
من أحلك اللحظات.. و من قلب محنة سيد قطب.. يولد كتاب "في ظلال القرآن".. تجربة انسان عاش في رحاب القرآن.. و تقاعل معاه.. بعيداً عن الدنيا.. في قلب زنزانة..
و من قبله ابن تيمية.. قمة النظرة الإيجابية..
يسجن و يعذب.. فيقول :
"ما يفعل أعدائي بي؟.. أعيتهم الحيلة.. أنا حبسي خلوة..و قتلي شهادة, و إخراجي من بلدي سياحية.."
و من قبله صحابي جليل.. يقتل .. فيقول "فزت و رب الكعبة"
و من قبل هؤلاء كلهم..
الحبيب.. يبعتلك بشارة من أكتر من 1400 سنة..
يقول :" عجباً لأمر المؤمن إن أمره كله له خير .. إن أصابته سراء شكر فكان خيراً له و إن أصابته ضراء صبر فكان خيراً له و ليس ذلك لأحد إلا للمؤمن ."
سبحان الله..
بل عجباً لهذا الدين الذي يصنع إنساناً قمة في الإيجابية..
اللي له حال مع القرآن.. يتعجب من السياق القرآني الإيجابي العجيب.. لايمكن انسان يعيش مع القرآن .. ويتربى على القرآن و معانيه حقاً.. و يكون سلبي ابداً..
لأنه كلام الله سبحانه و تعالى.. خالقنا.. و العالم بينا و بإيه يصلح دنيانا و أخرانا..
و العالم قد ايه النظرة الإيجابية ممكن تغير حياة إنسان.. ممكن تبني أمة..
"إن الله ليرفع بهذا الكتاب أقواما ويضع به آخرين"
طب ازاي الكلام ده؟.. ازاي النظرة الإيجابية و التفكير الإيجابي له الأثر العجيب ده؟؟
م ن ق و ل