درس الأحد
وَيَقُولُونَ هَـؤُلاء شُفَعَاؤُنَا
الواعظ الأب أبو حاحا
سعيدة ياولاد
التلاميذ
سعيدة مبارك
أبو حاحا
عاملين إيه ؟ مبسوطين كدة زى حالاتى ؟
تريزا
نحمد الرب
أبو حاحا
أصلى أول مرة من عشر سنين أصحى رايق وفايق ومزاجى عال العال
تريزا
وليه من عشر سنين ؟
أبو حاحا
من ساعة ماإتجوزت اُمكم أم حاحا
نجفة
لازم كنت بتحلم أحلام حلوة علشان كدة صحيت من النوم وإنت مبسوط
أبو حاحا
لأ علشان كنت نايم لوحدى وواخد راحتى على الأخر أشخر ماأشخرش أحلم ما أحلمش أضرب مدفعية ما أضربش لا حد يقوللي كانى ولا مانى ولا إعدل دماغك ولا حرام عليك كفاية كدة عاوزة أنام أو إإقفل البكابورت ده شوية وبلاش مدفعية الاوضة بقت ريحتها معفنة
نبيه
مدفعية إيه يابونا ؟
أبو حاحا
قصدها على المدفعية والقنابل الغازية المسيلة للدموع
مايكل
تلاقيك عميت الولية
قصدى عَميت امنا المسكينة بالغازات بتاعتك
مادلين
وكمان مش عارفة تنام ياحرام
أبو حاحا
وهو ده بإيدى ياولاد
مكرم
ماحنا عارفين إنه مش بإيدك ده بحاجة تانية
أبو حاحا
ده غصب عنى أنا ماباكونش دريان بحاجة ؟ أنا بأترمى على السرير زى الجحش إللي ركبه الرب وهو داخل اورشليم لأنى بأكون شايل حمول تقيلة طول النهار وما بأصدق إنى أحصّل السرير وبعدين ما تنسوش إنه مكتوب عندنا لَيْسَ مَا يَدْخُلُ الْفَمَ يُنَجِّسُ الإِنْسَانَ فمفيش عندنا حاجة إسمها نجسة فبناكل كل حاجة وأى حاجة وده بيكون لُه تأثير مِنّيل على المعدة نتيجة الرمرمة وده بيعمل عفانة فى البطن وبيظهر فى العرق والمدافع التقيلة ده غير الريحة المنتنة لما بنعمل إللي بالى بالكم
دميانة
ياااه على بابا ده لما بيعملها كلنا بنتخنق ونقعد نكتم فى نفسّنا ونسد فى مناخيرنا ومفيش فايدة وماما تقوله إيه ده يا مينا إنت بالع كلب ميت
مريام
إحنا بقى لما يكون فيه فيلم حلو وعاوزين نتفرج عليه فقبل ما نقعد بنفتح كل الشبابيك علشان التهوية ولما نكون فى الشتا والجو برد ومحتاجين نشغل السخن ماما تقول كل واحد فيكم يمسك نفسه علشان حنشغل التكييف علشان ما نتختنقش فصيح
مش عارف الرب بيكون مستحمل إزاى الخنقة والنتانة والريحة المعفنة دى وهو جوه فى بطننا
ناصح
زى ما إستحمل إنهم يضربوه على قفاه ويتفوا عليه ويشتموه والأخر يموتوه
أبو حاحا
لو سمحتوا خلونا فى موضوعنا
نجفة
كمل يابونا
أبو حاحا
شوفتوا بقى نتيجة كلامكم أهو أنا نسيت وقفت فين فى الحدوتة
نجفة
لما حضرتك كنت بتترمى على السرير زى الجحش إللي كان راكبه الرب وهو داخل اورشليم
مايكل
حلوة أوى لما الواحد يكون زى الجحش ونايم جنب آتانه على السرير
ناصح
أبونا عليه تعبيرات جميلة جايبها كلها من الانجيل
تريزا
والمدام راحت فين هى وحاحا ؟
أبو حاحا
حاحا مات وهوعنده 3 سنين وزعلنا عليه جداً ومن شدة حزننا عليه أنا وامه جتلنا سدة نفس عن الخلفة وإترهبّنا فى السرير
تريزا
طيب والمدام راحت ؟
أبو حاحا
راحت عند اُمها علشان تقعد عندها كام يوم لإنها مريضة وعلشان كدة مش عاوز حد فيكم يعكنن عليا بأسئلته البايخة وخصوصاً فى الدين فمش بعد الحلم الجميل إللى شفته ليلة إمبارح وأنا نايم لوحدى تقوموا تعكروا مزاجى وتخلونى أزعل منكم وآخد على خاطرى فإللي عنده حدوتة حلوة أوموقف طريف حصل بينه وبين القديس بتاعه وحابب يحكيه يتفضل وبردو إللي واخد على خاطره من القديس بتاعه ومحتاج نتوسطله عنده علشان يرضى عنه ويسهل له طلباته مفيش مانع يالّا مين حيبتدى ؟
فصيح
طيب ما حضرتك تحكيلنا الأول عن الحلم الجميل إللي شفته وإنت نايم لوحدك ليلة إمبارح
أبو حاحا
خلاص ماشى أحكى أنا الأول
مايكل
نسمع لو سمحتم أبونا حاحا حيقول إيه
أبو حاحا
ياابنى إسمى أبو حاحا حاحا ده إسم إبنى إللي مات ولم أجيلكم مرة تانية أبقى أحيكيلكم عن المواقف الطريفة إللي حصلت لحاحا قبل ما يموت وحكالى عنها بنفسه تريزا
مواقف طريفة حصلت مع حاحا وهو عنده 3 سنين وكمان حكهالك بنفسه ؟
أبو حاحا
أيوه حصلت معاه شوية معجزات بعدين أحكيلكم عنها
مايكل
نسمع لو سمحتم حدوتة أبونا أبو حاحا
أبو حاحا
أنا عمرى فى حياتى ماركبت عجلة من وأنا عيل صغير لحد ماكبرت إلآ فى الحلم بتاع ليلة إمبارح صحيح كان نفسى أركب عجلة وأنا صغير وحتى لما كبرت بس للأسف ماكنتش أعرف أسوق العجلة وكنت أبص للعيال الصغيرة وأحسدهم علشان بيعرفوا يركبوها المهم ليلة إمبارح فتحت التلاجة علشان أشوف أى حاجة أتعشى بيها قبل ما أنام لقيت الفرخة إللي مراتى قالتلى إوعى تقرب منها أو تيجى ناحيتها لحد ما أجى وأطلعها بنفسى من التلاجة علشان تفك و أقسمها علشان ناكلها على 3 أيام إن جيتوا للحق منظرالفرخة زغلل عينيا وهى متربعة فى التلاجة فوق الصينية والشيطان حلاها فى عينى قلت ياواد طلعها وإسلقها وحمرها وبر نفسك بيها يعنى مراتك حتعملك إيه ؟ مش ديتها حتقولك إدى وشك للحيط وإرفع إيديك لفوق وتوقفك ساعتين أو تلاتة وبعدين كام عصايا على المقعدة وإيه يعنى الفرخة تستاهل العلقة وبينى وبينكم كانت فرخة من الفراخ الامهات كبيرة ومنظرها يغرى الواحد المهم إنى طلعت الفرخة وحطتها فى حلة كبيرة مليانة ميا ورميت فى الحلة بصلتين زى ما هما وسبتها على النار
نجفة
إزاى زى ماهما ؟
أبو حاحا
يعنى صحاح بقشرتهم وبدون تقطيع الصراحة كسلت أأقشرهم وبعدين لما فكرت قلت لنفسى هو أنا حاأقشرهم ليه ؟ أنا مش محتاج الشوربة أنا محتاج الفرخة بس فإيه لازمة أتعب نفسى وأأقشر البصل وعينيا تدمّع وأنا حارمى الشوربة فى الأخر رحت رامي البصلتين فى الحلة زى ماهما حتى كانت فيهم بصلة معطنة ومعفنة وريحتها مش ولا بد قلت مش مهم أهو كله رايح فى الشوربة وقلت إن الفرخة علشان كبيرة حتحتاج وقت فى السوا فأريح جنبى شوية عقبال ما تستوى بس خُفت إن عينيا تروح فى النوم فقلت للقديس أبو لسعة وكنت بأحبه جداً لإنه عمل معايا مواقف جدعنة كتيرة ومعجزات قبل كدة وكانت الأيقونة بتاعته على طول على الكمودينو جنبى فقلتله أنا حاأريح شوية ياأبو لسعة وحاأتكل عليك تخلى بالك من الفرخة فلاقيته إبتسم وهز راسه يعنى موافق وشوفت هالة نور فوق راسه قلت فى نفسى هالة النور دى معناها إنه صحصح وحياخد باله من الفرخة
بيشوى
ألاقى فين يابونا الأيقونة بتاعة القديس أبو لسعة علشان أنا كمان عاوز واحد مادام بيعمل قوات كتيرة
أبو حاحا
ده أصله قديس قديم والأيقونة بتاعته أنا ورثتها عن بابا وكانت مع جدى قبل كدة وجدى ورثها عن أبوه وأبوه ورثها عن أجداده فممكن يكون شاحح دلوقت وصعب إنك تلاقيه
بيشوى
هو مش موجود فى السنكسار ؟
أبو حاحا
ممكن يكون ساقط قيد فمش حتلاقيه لا فى السنكسار أو الدفنار
بيشوى
ياخسارة أصل القديس بتاعى فين وفين لما بيوجب معايا ويعمل معايا معجزة مع إنى بأطينّله على طول ومش بأزعله مايكل تطين إيه يا طينة إنت إسمها بتعمله الميطانية بتاعته مش تطينّله
فصيح
المهم يابونا حصل إيه بعد كدة ؟
أبو حاحا
أنا حطيت فى بطنى بطيخة صيفى بعد ما إعتمدت على القديس أبو لسعة وريحت جنبى على السرير وشوية وعينى راحت فى النوم يعنى إللي حسبته لقيته
دميانة
أكيد القديس أبو لسعة سلقلك الفرخة وحمرهالك وجهزهالك عقبال ما تصحى
أبو حاحا
مش كدة وبس ده أنا لما رحت فى النوم لقيت نفسى فى قصر عظيم وقاعد على كرسى زى كرسى البابا بتاعنا بالظبط ولقيت قدامى ناس ربوات ربوات والوف الوف وبعدين سمعت صوت بينادى ويقول مدوا السماط قدام سيدنا أبو حاحا لقيت على طول إتمدت قدامى مائدة طويلة جداً ولقيت أربع عبيد جايين وشايلين صليب كبير عمرى ما شفت زيه ومصلوب عليه فرخة كبيرة محمرة وحطوها قدامى وقالولى بالهنا والشفا يابو حاحا ، الصراحة عينى كانت حتطلع على الفرخة ولسه حاأمد إيدى علشان أأقطع حتة منها لقيت واحد جاى شكله زى الحاجب وقاللى القديس أبو لسعة بره على باب القاعة وبيستأذن فى الدخول أنا قلت فى نفسى وده إيه إللي جابه دلوقت ؟ وكنت مضايق من جوايا وقلت هى يعنى حبكت وقت الأكل ولسه حاأقول وزعوه دلوقت وقولوله سيدنا مشغول لقيت واحد زى ما يكون وزير كبير بيقول دخّلوه بسرعة قوام على سيدنا أبو حاحا ولقيت القديس أبو لسعة داخل عليا فى منظر مهيب والحزن غالب على ملامحه ونظر ناحيتى نظرة كلها حزن فسئلته عن سبب حزنه فقاللى يعنى إنت وصتنى آخد بالى من الفرخة وأنا سمعت كلامك ووقفت عليها لما إستوت وبعدين حمرتهالك بالسمن البلدى وجهزتلك معاها السلطات بتاعتها وجبتهالك لحد عندك وإنت قاعد متسلطن على الكرسى والأخر مش عاوزنى أدخل عليك وأكل معاك قلتله أبداً أبداً قاللي الكلام ده مش على ابو لسعة وراح شايل الصليب من قدامى والفرخة عليه وقال للحرس خدوا إرموها فى الزبالة قمت مفزوع من النوم لقيت الدخان معبىء فى الشقة جريت على المطبخ لقيت الحلة إللي فيها الفرخة سودة ومحروقة ودخان إسود طالع منها ولقيت الفرخة بقت زى الفحمة قمت رمتها فى الزبالة خرجت من المطبخ ورحت الاوضة بتاعتى وبصيت ناحية أبو لسعة علشان أعاتبه لقيت على ملامحه إبتسامة خبيثة كلها شماتة قعدت أعتذرله وأتأسفله وأبوس فيه وقلتله أنا غلطان يابو لسعة سامحنى أنا أستاهل تحرقلى الفرخة وفين وفين لما لقيت البسمة رجعتله تانى وطلبت منه ينجينى من العلقة بتاعة مراتى والوقفة وأنا وشى للحيط ورافع إيديا لفوق لما ترجع ومتلاقيش الفرخة وده ياولاد يعلمكم إنه مهما يحصللكم مفيش حد يزعّل القديس بتاعه أو ياخد على خاطره منكم ويستمر يأديله الصلوات والميطانية بتاعته يالا مين حابب يقول حدوتة ؟
كيرلس
وإيه علاقة الفرخة بالعجلة إللي ركبتها حضرتك فى الحلم
أبو حاحا
صحيح نسيت أأقولكم إن الحلم أول ما إبتدى بعد ماخلصت الإعلانات لقيت نفسى راكب عجلة وماشى فى طريق كله ضلمة ولا فيه صريخ إبن يومين وفجأة لقيت قدامى 3 أشخاص وقفونى وواحد منهم سئلنى إنت أبونا أبو حاحا قلتله أيوه أنا هو قاللي عاوزينك جوه فى القصر إللي هناك ده بصيت ناحية ما شاورلى لقيت قصر عظيم وبعد كدة لقيت نفسى قاعد على الكرسى
يتبع بمشيئة الرحمن
المفضلات