ايه يعني تايبست وازاي أحسن من نفسي في هذه المهنة
السلام عليكم: أزيك يا أستاذة شيماء أنا جديد في الجروب ومش عارفة يعني ايه تايبست
حضرتك يعني بيجيلك ملف بي دي اف وبتكتبه في الوورد مع مراعاة شوية حاجات كدة
تمام يا أستاذة أنا قرأت وشفت كلامك في منشور المرة اللي فاتت وقررت انتظر كام شهر أتعلم واتنور كدة وابقى شاطر في مهنتي ونزلت يوتيوبات وبدأت اسمع وبتدرب الحمد لله لوحدي
لا برافو جدا انت دلوقت احسن من ناس كتير بتدخل على الخاص وتقولي علميني من الألف للياء (على دماغي لكن أنا كمان مش عندي وقت وعندي شغلي)
وغالبا مش بعلمهم برضه ببعتلهم فيديوهات ما انا قلت لكم قبل كدة محدش فاضي لحد
طب تمام اتعلمت شوية ابدأ اخد شغل من اللي بيتعرض اللي هو بنص جنيه ده
لأ اوعي خليك واثق في نفسك اوعي حد يستغلك أبدا هيصادفك شغل صعب وهتتعب وهتعتزل من أولها وانت فاكر ان اللي اداك الشغل على نص جنيه ده هيرحمك لأ طبعا مش هيرحمك وهيشهر بيك على الفيس وفي كل حتة ويقول عليك مبتعرفش تشتغل ويقول للناس اوعوا تشتغلوا مع فلان دا فاشل وخسرني 50 الف جنيه.
طب هعرف منين اني مستواي كويس من غير شغل ومن غير خبرة ما الشغل كله بيطلب خبرة والخبرة مش هتيجي من غير شغل
لأ هقولك كل ما توصل لمرحلة كويسة كدة وتتدرب عليها كويس في الوورد نزل حاجة كدة من النت كتاب أو مذكرة مدرس النت مليان حاول تكتب ولما تتعلم تنسيق بسيط كمان كدة وكل مرحلة اعمل كدة واكتب ورقتين ولا حاجة وابعتهم لحد خبرة من الجروب وانت وحظك بقى يا ما تقع في حد كويس ويشوف ويقولك تقييمك يا اما تقع في واحد مش هيفتح رسايلك أصلا وشوية بشوية اللي بيقيمك ده هيقول لحد عليك لما توصل لمستوى كويس كدة ويمكن رزقك من ربنا عن طريق الشخص ده ويمكن يكون بيوزع وتشتغل ان شاء الله
(أنا مستعدة لموضوع التقييم ده اللي عايز يعرف مستواه يبعتلي على الخاص ورقة يكون هو اللي عاملها وانا هقيم مستواه)
يكون هو اللي كاتبها انا مش بعمل اختبار لشغل بشرط ميكونش اشتغل قبل كدة #تمام؟