جديد في المهنة ومش عارف أعمل ايه حتى أتقن المهنة
أنا جديدة في الجروب ومش عارفة أبدأ منين أو أنا جديد في المجال ومش عارف اشتغل ازاي، وحاسس ان الدنيا تايهة أوي شوية ناس بتتنزل شغل مستعجل وشوية ناس بتتخانق وأنا لسة معرفش أي حاجة اعمل ايه؟
دا السؤال اللي بيتسأل في الأول من معظم الناس في البداية وتقريبا كلنا كنا كدة
ودول بيكونوا نوعين ياما ناس فعليا بتعرف تشتغل من مكتبة أو دورات أو غيره لكن أول مرة تشتغل أون لاين
وناس تانية متعرفش أصلا يعني ايه وورد
طب يا سيدي أنا هقولك تعمل ايه
مبدأيا كدة حتى لو بتعرف تشتغل على الوورد اوعي تاخد شغل، الشغل على النت غير الشغل على الطبيعة خالص
طب أنا يا أستاذة بعرف اشتغل يبقى ليه ما خدش شغل
لأ حضرتك متاخدش شغل لأنك أولا ممكن تتعرض لعمية نصب وتشتغل وصحيح هيكون مبلغ صغير لكن انت كأول تجربة ليك هتبقى مشكلة غالبا هتيأس وهتبطل شغل من أولها يا اما مش هتعرف المصطلحات والمواصفات بتاعتنا وساعتها مش هيحاسبك ولو حاسبك هتقع من أولها ريح نفسك أنا بكلمك بواقع خبرة مش قليلة
طب اعمل ايه؟
حضرتك هتفضل أد شهرين كدة مش هتعمل حاجة غير انك تتابع جروبات التايبست دا لو انت بتعرف وورد يعني وتحاول تقوي نفسك في الوورد كمان وتاخد بالك أوي من أسماء الناس اللي دايما بتوزع شغل واسمها بيتكرر
أه أه هي دي الناس الكويسة بس؟ لأ حضرتك في ناس تانية كويسة وانت ورزقك بقى لكن مش بتعلن في الجروبات
طب دول هيعرفوني ازاي؟
ما انت لما هتتعرف في الجروب شوية بشوية انت كمان الناس دي هتعرفك وهتدخل تكلمك على الخاص وساعتها بقى يبقى ربنا كرمك هيبقى معاك عميلين ولا تلاتة ومش هتحتاج الموزعين اللي ع الجروب دول لو محصلش نصيب مع حد من دول اصبر بقى وخد شغل من الموزعين دول لكن متخليش حد ييشتغلك ما انت بقى خلاص من خبرة شهرين ع الجروب بتشوف بس عرفت السعر المناسب وعرفت الناس الكويسة
بالنسبة بقى للناس اللي لسة مش عارفة حاجة في الوورد لأ انتوا لسة قدامكم شوية اوعى تخاطر وتاخد شغل هتوقع من قبل ما تبدأ
كلمة السر هي التعليــــم، النت مليان كتب ومواقع عن الوورد ، اليوتيوب مليان فيديوهات، نزل وورد مناسب اتعلم على أد ما تقدر اكتب لوحدك اشتغل وابدأ على نفس اللي الأولاني عمله لكن كون انك تعتمد على حد يعلمك من البداية انسى محدش فاضي لحد صدقني كل الناس الكبيرة مشغولة عقبالك زيهم واسأل على فكرة السؤال مش عيب.
ربنا يرزقنا جميعا يارب