يوميات عم رمضان مرة وعدت والرب سلم

[showman]

البياع ضحك وقال لشيحه بتقول عاوز تروح فين ؟
رد شيحه عليه وقال ميدان التحرير
البياع الظاهرعليه مسكين مش عارف السكة فنده على بياع تانى قُريّب منه وقال متعرفش ميدان التحرير يروحوله إزاى يا سمكة ؟
لقيت الجدع ده إللي إسمه سمكة بيضحك وقال
هما عاوزين يروحوا ميدان التحرير ؟
فرد عليه وهو بيضحك وقال أه
رد عليه البياع إللي إسمه سمكة وقال طيب إسئلهم هما عاوزين يروحوا تمشية ولا حيركبوا مواصلات ؟
أتارينا يا شيخ رمضان فى ميدان التحرير وإحنا ما نعرفش علشان كدة كانوا بيضحكوا علينا
وبعدين سمكة قال لشيحه يعنى الراجل إللي معاك جابك مصر وماعرفش يوصلك ؟
شيحه قال لسمكة يوصلنى إزاى وهو رجل كفيف وأول مرة ينزل مصر وبعدين أنا إللي جايبة معايا
ولاقينا واحد بيقول ياجماعة خلوا بالكم الراجل إللي لابس جبة وقفطان ده مخبر وعامل نفسه شيخ
وفجأة لاقينا الناس إتلمت حوالينا
وإللي يقول إللى عامل نفسه أعمى ده شفته قبل كدة بيحدف طوب علينا
وإللي يقول ده جاسوس وعامل نفسه شيخ
وإللي يقول هو فيه شيخ من غير دقن
وإللي يقول إحنا مش قفشناك قبل كدة وكنت ساعتها لابس أفرول ولازق دقن
وإللي يقول حاسب ليكون معاه سلاح
وبقيت يا شيخ رمضان مش قادر أتكلم م الخانقة
ومن الإقلام إللي نازلة على صداغى وعلى قفايا بعد العمة ما وقعت على الأرض
وبعدين سمعت واحد بيقول كتفوه وهاتوه جوه فى الخيمة لما نشوف حكايته إيه ده كمان
وواحد تانى قال صح كدة ولما نمده على رجليه وننفخه حيعترف غصب عنه
عم رمضان
ياخبر مش فايت
عوضين
طب وشيحه راح فين ؟
الشيخ حسن
أنا ما سمعتش صوته خالص إلا بعدين فى الخيمة
عم رمضان
كل ده ومش قادر تقوللهم الحقيقة
الشيخ حسن
أنا صداغى سخنت من كتر الضرب وكمان إللي ماسكنى من طوقى خانقنى ومش عاطينى فرصة أنطق
عوضين
ياعينى يا شيخ حسن
كل ده وإنتوا على لحم بطنكم وما أكلتوش ولا لقمة بحتة جبنة
الشيخ حسن
جبنة إيه يا عوضين ده إنا أكلت ضرب وكمان ضرب مشّكل
على صداغى وعلى قفايا لحد ما شبعت وإستكفيت
وإتبهدلت أخر بهدلة
والأخر خدونى على الخيمة وأول ما دخلت سمعت صوت ضعيف يبان إن صاحبه مستوى على الأخر وقاللي إنت جيت
قلتله وإنا باطلع الكلام بالعافية مين شيحه ؟
قاللي أيوه يا شيخ حسن
قلتله إنت متكتف زي ولآ سايب
قاللي الحال من بعضه
قلتله ما شوفتش إللي حصللنا ده فى الرؤيا بتاعتك
قاللي أنا صحيت من النوم وإنت جنبى بتصلى
قلتله ياريتك كنت كملت بقية الرؤيا
قاللي ماهو لوشفته مكناش نزلنا من أصله بس ده مكتوب يا شيخ حسن
عم رمضان
ده إنتوا إتبهدلتوا على الأخر
وبعدين ؟
الشيخ حسن
وفين وفين لما سابونا من إيديهم وفكّونا بعد ما إتأكدوا إننا مظلومين وشافوا البطايق بتاعتنا وعرفوا إننا من الأرياف وبعد شيحه ما حكلهم عن الرؤية إللي شافها وواحد فيهم قاللى معلش يا شيخ سامحنا إحنا إفتكرناك جاسوس علشان مالكش دقن
مارضتش أأقوللهم إن حلاوتهم مش عاوزانى أربى دقنى علشان بتشوّكها وقلتلهم أصلها بتعملى حساسية
وجابولى العصايا بتاعتى وواحد منهم جرى وراح جاب حتتين تلج عطانى حتة وقاللي إمسكها وخليها على خدك ده شوية وخدك التانى شوية علشان تهبّط الورم وعطى الواد شيحه الحتة التانية
وقالولنا إستنوا لما نعملكم شاى الواد شيحه قال
كتر خيركم إنتم عملتم الواجب وأكتر
واحد قاللنا إللي ضربوكم البياعين والبلطجية وإحنا نعتبر إنقذناكم لما كتفناكم وجبناكم الخيمة
قلتلهم والله ما مستهالة إنكم تجيبوا قوالح وتولعوا علشان تعملولنا شاى
الراجل ضحك وقاللي قوالح إيه يا شيخنا إحنا عندنا كل حاجة البوتاجازات والغسالات الأتوماتيك والتلاجات إومال إحنا جبنالك تلج منين وكمان عندنا التليفزيونات والدش وكمان موصلين نت
الواد شيحه قال ربنا يزيدكم من فضله كمان وكمان
قالوا وفيه حمامات لو حد فيكم عاوز يفك نفسه
قلتلهم وإنتوا ساكنين فى المطرح ده بقالكم كتير ؟
الراجل قاللي إنت بتتريق يا شيخ ؟
قلتله مش قصدى أنا عاوز أأقول كل ده فى الخيمة ؟
قاللي أيوه يا سيدى كل ده فى الخيمة وعندنا كمان سراير ودواليب وفيه ناس إتجوزت هنا ودخلت هنا وخلفت عيال هنا
الواد شيحه حب يجاملهم فقال بصراحة أنا لو منكم ماأسيبش الميدان خالص والحكومة تروح تعمل لها ميدان تحرير تانى
المهم شربنا الشاى وقلنا نستأذن علشان نلحق أخر ميعاد للاتوبيس
واحد منهم كترخيره قال إنتوا تعرفوا تروحوا الموقف قلتله نبقى نسئل قاللي طيب تعالوا أنا حاأوصلكم
قلتله مش عاوزين نتعبك
قاللي مفيش تعب ولا حاجة العربية موجودة
قلتله إنت رابطها فين ؟
قاللي هى حمارة حاربطها ؟
قلتله قصدى حاططها فين ؟
قاللي أنا راكنها هنا فى الميدان
وأخدنا معاه ولما وصلنا الموقف الواد شيحه قاللي
إنفخ نفسك يا شيخ حسن وإنت نازل من العربية علشان الواد حنتش واقف أهو هو وامه مستنين الاتوبيس
قلتله والنبى يا شيحه ماتجبليش سيرة النفخ أحسن من ساعة الراجل إللي قال لما نمدهم وننفخهم حيعترفوا وأنا ركبى سايبة لحد دلوقت
الراجل إللي موصلنا ضحك ٌوقال إفتكر بعد كدة مش حتفكروا تنزلزا مصر تانى وحتقولوا توبة النوبة
قلتله أهى مرة وعدت والرب سلم
ونزلنا من العربية وسلمنا على صاحبها وأخد بعضه ومشى وسمعت صوت الواد حنتش وهو بيقوللي كويس إنكم جيتم فاضل عشر دقايق على الاتوبيس
قاللي مالك يا شيخ حسن وشك وارم وشيحه هو كمان وشه وارم ؟
الواد شيحه جه يتكلم غمزته فى إيده علشان ما يتكلمش وقلت لحنتش أصل لما جعنا وحبينا ناكل فيه ناس ولاد حلال وصفولنا مطعم إنما إيه حابقى أوصفهولك بعدين
المطعم ده عامل أكله جديدة إسمها كُل واشبع وإسمن
كلها بهاريز وبهارات وتمنها كلام فاضى
إنت تاكل الأكلة من هنا تحس بسخونة وجسمك يبتدى
يتفتح وتلاقى صداغك تبدأ تورم وتقلبظ وبعد يومين بقية جسمك يسمن هو كمان
وبعدين سئلته وإنتوا عملتوا إيه ؟
قاللي أنا قدمت الطلبة لأبونا وكان مستقل الفلوس إللي معايا وقاللي بالمبلع ده ما أضمنش نجاح العملية ميه فى الميه وامى حبت على إيده وقالتله إحنا جبنالك ثمن الحمارة إللي بعناها على القرشين إللي حنتش كان محوشهم علشان يتجوز بيهم وفين وفين لما قبل إنه ياخد الفلوس وقاللي إكتب عنوانك بالظبط علشان أم النور أوالقديس إللي حيجيلها يعمل لها العملية ما يتوهش
وسئلت أبونا عن ميعاد مجى العدرا أو أبونا أبو شخشيخة علشان امى تحضّر نفسها
قلتله تحضّر نفسها إزاى يا شيحه ؟
قاللي علشان تتسبح وتنضف نفسها
قلتله وبعدين يا شيحه ؟
قاللي أبونا قال مالوش لازمة التحضّير والفاضى منهم حيجيلكم
إحنا عملنا إللي علينا بخرنا وصلينا وقلنا الطلبة والباقى على العدرا وأبو شخشيخه وبعدين إنت وحظك
لو حد كان فايت من القديسين بتوع الحصاوى وسمع الطلبة حيتصل بينا علشان ياخد العنوان
فمش عاوز أعطيك ميعاد وما يجيش حد منهم وكمان لازم تستنى دورك
بس إنت قول يارب العدرا ما تطلبش أشعة رنين
قلتله وهو فيه ناس كتير مقدمة طلبات ؟
قاللي دول ناس ياما يا شيخ حسن ما يتعدوش
قلتله ما بدل اللفة دى يا حنتش ما تقولوا يارب
والرب هو الشافى
قاللى الرب بيسمع من أبونا ما بيسمعش منا يا شيخ حسن
المهم وإحنا بنتكلم جه الاتوبيس وركبنا وأنا جسمى ووشى بيوجعونى ولما نزلنا شيحه حب يوصلنى الدار قلتله لأ خليك كفاية إللي فيك أنا حااشوف حد يوصلنى ولقينا الواد الصغّير إبن حسين العقر فايت شيحه ندهله علشان يوصلنى ولما حلاوتهم شافتنى بالمنظر ده صوتت وبت طول الليل وأنا باتوجع ومش قادر أتقلب لا على جنبى ده ولا على جنبى ده وفضلت لتانى يوم وأنا تعبان
عوضين
دى حكاية ولا فى الرواية
الشيخ حسن
وعلشان كدة مقدرتش أجيلك ليلة إمبارح
عم رمضان
لأ ألف سلامة عليك يا شيخ حسن
بس إنتوا غلطانين علشان رحتوا التحرير
الشيخ حسن
أهى مرة وعدت يا شيخ رمضان