الهجرة

بَعد الصلاه ع النَّبي زادِي وِزِوَّادي *** أقول على اللي جرا . . بعد المؤامرادي
الوحي جه م السما . . للمصطفى الهادي *** يقول له هاجر . . بأمر الواحد الخلاَّق
روح المدينه . . تيلاقي الحب . والأخلاق *** قال النبي تبقى هجره م الوطن وفراق !!
عزيز عليَّه الفراق .. واللهِ .. يابلادي
***
يصعَب عليَّه أَسيب أحبابي بتقاسي *** من ظلم مكه وقسوة شعبها القاسي ! !
ليه ياعَشيرتي كده ؟؟ ياأهلي .. ياناسي !! *** دَنا ابنكم . . مِنِّكم .. دي آخرة العشره
دَنا لكُم جِيت بِعِزِّ الدُنيا والآخره *** تكذْبوني . . وتضطرُّوني لِلهجرة ! !
مَعَلهش . . مَوْعدنا بُكره ، تِرتِفع راسي
***
مَوْعدنا بُكره . . وبُكره صُبْحُه جيِّ قريب *** وِمْسيره يُوم العدو يِصفى وِيبقى حبيب
وِمْسيري أرجع لِبلدي . . مهما عِشت غريب *** بإذن واحد أَحَد أَكبرْ نَصير وِمُعين
اللي وَاعدني بِنصره كلِّ وَقت وْحين *** حاجِي لْكو تاني . . وِأْدخل دخْلةِ الفاتحين
ربي وَعَدني بِنصر مُبين ، وِفتح قريب
***
رَّاح بيت أبو بكر .. قال له .. هِجرَه .. ياصِدْيق *** وانت معانا في هِجرتنا . رَفيق وِصَديق
أَخُويا في صحبتي . . وِزْمِيلي وقت الضيق *** خلِّيك يا ابو بكر في دَارَك على استِعداد
وقام أبو بكر ما خَلَّى لا مال . . ولا زاد *** لمْ اللي حيلته . . ما سابْشي حاجه للأَولاد
واستنَّى وَقت المعاد ، يِمشوا في أي طريق
***
أَسماءْ كرِيمتُّه وِهُوَّه شايل الشْيله *** فِهْمِت غَرَضْهم .. وِرِحلتهم .. في دِي الليله
وَبْخِفْه قامِت بِدَال ما تِبقى هُليله ؟ *** سَاوَت شُقافه ، وِلفِّتها في صُرَّه حرير
وِسِيْدها ابو قْحافه كَان راجل كبير . وضرير *** نَدَهِت لُه حسِّس عَليها ، ظنِّها دَنانير
سَايِبْها إِبنه الكبير ، لِلصَّرْف ع العيله
***

يتبع .