اخيرا اسلمت ......freemanmuslem
بداية القصة يبدا مع واحد من جيراننا وكان زميلى فى المدرسة هو بصراحة كان من احب الناس ليا بالرغم انه مسلم بس احنا لقينا نفسنا بنحبه سواء انا او اى حد من شارعنا او فى المدرسة لانه بصراحة كان مودب جدا وشاطر جدا حتى انه كان فى المدرسة من اوائل الطلبة المهم جارى ده بدا يربى لحيته و يمشى مع ا لشيوخ فابتدينا نقلق منه علشان احنا عارفين انهم ما بيحبوش المسيحين بس لقيناه عادى جدا ومعاملته ماتغيرتش مع اى حد مننا فكنا بنتعامل مع بعض عادى وكنا بنخرج ونطلع رحلات مع بعض ولينا صور كتير مع بعضنا وفى مره كان ابونا ### بيزورنا فى البيت وابويا كان نازل معاه يوصله وهو نازل كان جارنا ده طالع بيتهم ولما لقى ابونا ### واقف مع ابويا راح سلم علي ابويا وسلم على ابونا ###وقاله اهلا وسهلا بحضرتك ونورت عمارتنا وياريت تشرفنا شوية راح ابويا عرفه على ابونا### وقاله ده فلان ساكن فى البيت الى فوقنا فرحب بيه وبعدين لما ابويا رجع للبيت قال لامى والله الواد ده فعلا ولد محترم حصل منه كده وكده فردت امى وقالت هم من يومهم ناس محترمين فرد ابويا وقال والله لو كل المسلمين كانو كده كانو ريحو عقلهم وريحونا معاهم ففرحت جدا عشان امى وابويا كانو بيطلبو منى انى ماتكلمش معاه فى حاجه ملهاش لزمه وكنت بقول لهم هو عمره ما كلمنى فى حاجه من دى والمشكله ان احنا لما كنا بنحب نخرج مع بعض مكنش حد بياخذ باله ان انا مسيحى لانه كان ملتحى وطبعا مش معقول الى هايكون ماشى معاه مسيحى فكانو بيفتكرونى مسلم لكن الى عارفنى عارفين انى مسيحى وده صاحبى وكان بيعمل رحلات صيد كل يوم جمعه
مع اصحابه فقلت ليه فى مره عاوز ابقى اطلع معاكم فقالى حضر عدتك وفلوسك واحنا جاهزين وابتديت اطلع معاه فكان الميكروباص يجى ياخذنا قرب الفجر ويرجع لنا قبل الجمعه بساعه تقريبا وكان المشوار ياخذ نص ساعه او ساعه حسب المكان الى هانروحه والمشكله الى حصلت ان كان من الى بيطلعو معانا ناس ملتحين اصحابه وما كانوش يعرفو اننا مسيحى فى الاول لحد ما فى مره واحنا بنصطاد واحد منهم عرف اننا مسيحى فقال للتانين ففجاه لقيتهم اخذوه على جنب وقعدوا يكلمو معاه بس انا فهمت ان الكلام عليا لانى لقيته بقولهم خلاص ما عدش حد يعمل حسابى بعد كده فقعدو يراضوه وعدو الموضوع وبعد كام مره لقيتهم مشغلين فى الميكروباص شريط بيتكلم عن البنت الى اسلمت فاتغاظت جدا منهم فلما اجا يركب هو سمع الشريط فزعل وقالهم ايه الى انتو مشغالينه ده لو سمحتو شغلولنا قران عشان ربنا يرزقنا شويه سمك حلوين وانا عارف انه عمل كده مخصوص عشان ما يزعلنيش المهم لقيتهم عمالين يلقحو بالكلام على نشيد الانشاد والبنت الى اسلمت فى الشريط فغضبت جدا منهم ورحت قايلهم بطلو باه فبركة وكذب انتم ما بتزهقوش من الافلام دى والله مهما عملتم مش هتهزو ايمانا بربنا فلقيتهم بيردوا عليا بمنتهى السفاله ولقيت جارى غضب جدا مننا وقالهم انا اصلا غلطان اننا طلعت مع شويه عيال ورحنا اخذين بعضنا ومروحين انا وهو واحنا فى الطريق كنت غضبان جدا وبقوله انتم ليه بتعملو كده قالى يعنى ايه انتم انا عمرى عملت معاك حاجه زى دى قلتله طب ليه بيكرهونا كده وبعدين ياعم المفروض ان الدعوه تبقى بالحسنى مش بالكذب والتاليف فرد وقالى انا مش هرد عليك الا لما نروح علشان انت شكلك هاتخرف ولما روحنا طلعت البيت وهو طلع بيتهم وبعدين نزل راح يصلى الجمعه وبعدين وهو طالع خبط علينا فقلت لامى قوليله نزل قالها طيب قوليله لما يرجع يطلعلى ضرورى عشان عايزه فسالتنى امى هو حصل ايه قلتلها مافيش اصل انا اتشاكلت مع اصحابه على شويه سمك واطريت اننا اكذب على امى عشان انا عارف لو هى عرفت هاتقول لابويا وممكن يبقى فى قلق وممكن يقولولى ما عدش اتكلم مع جارنا او اروح معاه فى حته تانى و بعدها لما هديت خالص قلت اطلع اعتذر ليه لانه عمره ما زعلنى ومش معقول اخسره علشان شويه عيال زى دول فطلعتله ودخلت معاه البلكونه بتاعته وقعدنا نتكلم فقالى انت ايه الى زعلك اوى كده قولت له اصلها باينه اوى انها مفبركه وبعدين لما هى فرحانه انها اسلمت اوى كده ما قلتش هى مين ليه عشان حتى نصدق الكلام ده قالى ليه انت عايزها تروح زى الى قبلها فقلتله انتم مين الى فهمكم كده احنا عمرنا ما بنجبر حد على حاجه وبعدين الى عايز يسلم هو حر لانه هو الخسران فى الاخر فقالى و مين قالك ان احنا بنالف القصص دى وهنلفقها ليه قولت له امال مين الى هايالفقها قالى بص احنا صحاب من زمان وعمرى ما كلمتكش فى اى حاجه زى دى بس انت طالما اخذ الفكره دى عننا يبقى لازم اوضحلك الصوره موضوع التاليف والكذب ده انتم الى تعرفوه لاننا مش محتاجين للكذب علشان تسلمو او ماتسلموش لان كل واحد حر وكل واحد هو الى هيخسر فى الاخر وانا هاثبتلك بالدليل دلوقتى ففتح الكمبيوتر بتاعه وورانى شويه حاجات عن المسيحين قلتله ياسلام طيب وبعدين لما انت عندك الحاجات دي امال كنت بتمثل عليا ليه ان انت مالكش دعوه بيهم فقالى يبنى انا لازم علشان اعرف حد كويس لازم اقرا عنه من كتبه ومن افعاله مش مجرد اننا اسمع عنه وخلاص فقلت له طيب مانا عندى اكتر من كده عن المسلمين فضحك قوى وقالى طيب مانت مزاكر كويس اهه يبقى نبدا بالكلام الجد بس عايزين شويه عقل ومش عايزين هبل ولا لعب عيال قلتله موافق فراح مطلعلى مناظرات احمد ديدات قلتله قديمه قالى مش مهم قديمه ولا جديده انا هاوريك حاجات معينه بس فجاب اول واحده وورانى الحته الى قال فيها جيمى سواجرت المولود وغيرها المتفرد وبعدين انكر انه قال فى كتابه انه قال الله شخص وجابو كتابه على الشاشه ونفس الحكايه مع انيس شروش لما غير كلمتين فى ايه القران قلتله وايه يعنى يبنى دول غيرنا قالى طيب هاوريك حاجه بتاعتكم راح مطلعلى مسرحيه الكنيسه المعروفه وقالى بزمتك احنا عمرنا عملنا حاجه زى دى عنكم قلتله ماعرفش قالى خليك صادق مع نفسك قول ماشوفتش لكن ماتقوليش ماعرفش وراح مطلعلى محاضره كانت فى الكنيسه مش فاكر اسمها بس كان فيها شويه قساوسه بيتكلمو عن المسلمين والى عنده سوال يساله والاب بيجاوب عليه ففيه واحد سال ان المسلمين بيقولو ان مراحل الجنين موجودة فى القران بالظبط فايه تعليقكم المهم ان السوال ده محدش رد عليه نهائى وتاه وسط الاسئله قالى شوفت قالى وعلى ايه انا هاوريك اكتر من كده وورانى شويه حاجات من دى كتير فقلتله مش معنى ان واحد ولا اتنين كذبو يبقى ديننا كله غلط فضحك وقالى كل دول واحد ولا اتنين يبنى دول الى بيمثلو الكنيسه والدين امال انت عايزنى امشيلك على كل واحد مسيحى وبعدين افرض ان دول واحد ولا اتنين طيب مش المفروض ان البابا شنوده يحاسيهم على ده وانت عارف ان السكوت علامه الرضا فقلت له يمكن ما بيشوفش الحاجات دى فالى ليه معنى كده ان البابا مالوش لازمه لما كل واحد يعمل الى على مزاجه فقلتله طيب مانتو بتعملو اكتر من كده قالى زى مين قولت له عندك المشايخ الى بيجو فى التلفزيون كل واحد عمال يهبل على كيفه وشيخ الازهر ساكت عليه برده قالى هو شيخ الازهر زى البابا احنا يبنى فى الاسلام كل واحد مسؤل عن رايه هو وبعدين حتى شيخ الازهر نفسه لما بيغلط علماء الدنيا كلها بيردو عليه وبعدين قالى لما يكون كل الى انا ورتهملك كذابين يبقى معنى ذلك ان الى قبلهم كذابين والى قبلهم والى قبلهم وبعدين عايز تصدق هاوريك بعينك ودخلنا على شويه منتديات مسيحيه وورانى اللعب الى بيحصل وقالى شوف بقى الكذب الى على اصوله قلتله وهو يعنى منتدياتكم ما بتالفش طيب مانا شايف التاليف على ودنه فقالى يعنى ايه تاليف التاليف يبنى اننا اقول حاجه ملهاش اصل او دليل وقولك ان ده صح واقنعك بكده انت شايف ان المسلمين بيقولو حاجه ماهيش في دينهم من غير دليل من القران او السنه وبعدين اخنا ها نغنى على بعض ليه تعالى نتراهن على حاجه فقلتله حاجه ايه قالى بص انا هادخل على موقع مسيحي قدامك ونشوف هيعملو ايه وانت ادخل على موقع اسلامى وشوف هيعملو ايه ايه رايك فقلتله يعنى ايه هايعملو ايه قالى يعنى الى هيكذب او يشطب او يحذف او يالف يبقى هو الغلط فقلتله ماشى بس ادينى فرصه افكر الاول هاكتب ايه وانت خد برده فرصه فقالى انا جاهز من دلوقت لو حبيت المهم حطيت الموضوع ده فى دماغى واعتبرته تحدى بينى وبينه وقعدت ادور فى منتدياتنا على ايه احسن حاجه ممكن احطها فلقيت كلام كتير بس المسلمين بيردو عليه بادلتهم بس وقعت عينى على حوار جميل عن ماساة البرص فى الاسلام ولقيت ان الردود بتاعته اى كلام ليه لان الرد انه مش سام يبقى الى بقول انه سام كذاب وبرده الى هايقول انه كان بينفخ على ابراهيم كذاب لانه ما بيستحملش الحرارة فقلت هوده الى انا عاوزه وبعدين رحتله وقولتله انا جاهز بسوالى قالى ماشى بسانا عايزك تحطه فى منتدى اتباع المرسلين قلتله اشمعنى قالى عشان انا عارفه كويس وبعدين انت مش الى يهمك الرد وخلاص قلتله ماشى بس لو ماعرفوش يجاوبو او مسحو السوال بتاعى قالى لو عملو كده هاحلق دقنى من بكره قلتله طيب احلف قالى قسما بالله العظيم لااعملها قلت هو ده فقلى بس بشرط السوال يكون مودب مافيهوش قله ادب قلتله لااطمن ده ميه ميه فدخلت لو تفتكرو باسم البورسعيدى وحطيت السوال وكان كده ليه محمد خلى البرص عدوه ؟ فضحك وقالى ده مودب امال لو قليل الادب كان يبقى ازاى قالى ماتنفعش الصيغه دى اكتب بالغه العربيه واحترم نبينا زى انا مابحترم السيد المسيح فكتبت لماذا جعل نبى الاسلام الوزغ (البرص) عدوا له ؟
وقالى هاانشوف الرد بعدين وقعدنا نتناقش مع بعض فى موضوعنا انا اجادله وهو يجادلنى لغايه ماروحت ولما بصيت بعد كده على الاجابات قلت هو ده الى انا عاوزه فرحتله تانى يوم وقلتله حضرت الموس قالى ليه هو مش ردو عليه قلتله ماهو ده الى احنا قولناه من الاول هو اى رد والسلام رد ايه يبنى واحد بقولك ده مسمم والتانى بيقولك ده نفخ النار على ابراهيم والى طينها ان واحد كتبهالك فرنساوى يعنى احنا عارفين عربى لما خلاص نكتبها فرنساوى وواحد بقولك علشان ده نبى كله تاليف فى تاليف فقالى المهم انهم ماعملوش زيكم ولغو السوال وقعدت اجادله فى الموضوع براحتى كل مايطلع حجه ارد عليه واجيب له الدليل من جوجل يقولى سام اقوله ورينى ايه الدليل العلمى يقولى مش ده السبب الرئيسى لانه كان بينفخ على ابراهيم اقوله ينفخ ازاى يبنى على نار زى الجحيم وبعدين الدليل قدامك انه ما بيستحملش الحراره فوق بقى يبنى وحب يهرب من الكلام فدخلنا فى مواضيع عن الكتاب المقدس وخرافاته ويحاول يقنعنى بيها وانا اقوله بس برص يعمل كل ده برده وابتدى يضايق من كلامى فقولتله انا هاروح بقى لحسن الاقى برص واقفلى على السلم ولا حاجه بعدين يبخ سمه عليا ولا يولعنى وروحت وقلت فى نفسى هو ده الى معاه ربنا ماحدش يقدر عليه وبعدين بعد كده لقيته بينده عليا فقلت له خير فى برص عندك عايزنى اقتلهولك ولا ايه قالى لا تعالى وهات معاك الموس وضحكنا وبعدين طلعتله فقالى يلا علشان نويت احلق دقنى فقلت له ايه ربنا هداك فقالى ايوه وخصوصا بعد ما قرات الموضوع ده فقلتله موصوع ايه قالى اقرا وانت تعرف فقرات رد ايات من الله فلقيته فعلا رد على كل الى انا قراته فى المنتديات بتاعتنا من غير ما اساله فقالى ايه احلق ولا استنى شويه فقلتله استنى اقراه تانى فقلت فى نفسى طيب هو جاب الرد ده ازاى وربنا ازاى يسيبه يفكر بالطريقه دى فاستغربت قوى وقولتله بس هو الف الرد ده ازاى فقالى برده تاليف ده اجتهاد امال هو ربنا اعطانا العقل ليه وبعدين هو كذب فى حاجه الكلام قدامك وهاتلى منه حاجه غلط وبعدين ده حاطتلك الرد كمان من كتابكم فبصراحه من جوايا اتهزيت جامد لانى قلت ازاى لو هما غلط ربنا يساعدهم بالطريقه دى فالمهم قعدنا نتناقش وقالى انا هاوريك بقى الكذب بتاعكم وراح مطلعلى منتدى وورانى حاجه حلوه اوى موضوع بيناقش الله وبقول لا اله اسمه الله وبعدين كاتب الموضوع بقول فى اى رساله سماويه اعلن ذلك الاله عن اسمه الله ؟
وقالى ده انتم كل كتابكم من اوله لاخره الله ففعلا انا استغربت جدا ازاى يسمحوله يكتب كده فقلت له طيب وانت مارديتش عليه ليه فقالى حاجه بسيط ه هاوريك ايه الى بيحصل وجابلى منتدى مسيحى تانى وورانى حاجه هو عملها فى موضوع اسمه تاليه الحاشر فى قران الرحمن ؟ فرد عليه بالدليل من كتابى انا بنفس السوال وراح مصوره وخزن الصوره عنده وبعدين بصينا لقينا الرد تم حذفه و جاوب على سوال تانى بعنوان هل هو يامر بذلك ؟؟
بس نسى يصوره وبعد ما حط الرد من كتابى برده لقينا الرد تم حذفه بس لحسن الحظ ان واحد اسمه الداعى كان اقتبس منه حته فى المشاركه الى بعده على طول علشان يبقى الدليل موجود وقالى لو تحب اردلك على كل الاسئله الموجوده دى بس انت شوفت الى بيخصل انهم بيضللو الناس وبيعتمدو على الكذب والى يرد رد مقنع يتم حذف رده باى حجه فبصراحه ما عرفتش ارد عليه المهم قالى انا عاوزك تقرا الكلام الى هاقولهولك ده وتقولى رايك فيه وكتبلى شوية ارقام لاصحاخات من الكتاب المقدس باعدادها وقالى اقراها كويس وبعدين نبقى نكمل كلامنا وما تنساش الموس وانت جاى
فلما روحت ما جاليش نوم وقعدت اقرا الكلام الى قالى عليه وادور على تفاسيره والى طين العمليه اكتر انى شوفت حاجه وراهالى حوار عن البابا شنوده انه بيقول ان برنابا ماهوش انجيل لان ربنا مش ممكن يقول كلمه براز فى كتابه والى بيرد عليه جايب انها فى الكتاب المقدس نفسه وجايب دليله من كتبنا فقلت ازاى ان البابا ماخدش باله من دى وبعدين هو قالى انا عايزك تسمع المناظره الى بين الشيخ وسام وبين ابونا عبد المسيح وبالزات ساعت ما قعد يقوله ان احنا الهنا عال مش متعال فرد وسام وكبسه من كتابنا فازاى ان ابونا مايخدش باله من دى وبرده لما الشيخ وسام اتصل بابونا هابيل وقعد يقوله شويه حاجات من الكتاب المقدس وابونا قعد يضحك زى ما يكون اول مره يسمع الكلام ده وضحك قوى لما قاله الميه مضره وقاله ان ده ليه تفسير طيب ماهو لازم يكون عارف الاجابه لانه ابونا والمفروض هو الى يرد فقعدت اشوف التسجيلات كلها وحتى الى اسلمو فقعدت كام يوم حالى متبرجل ان ازاى كل ده عندنا وبيحصل كده فقلت ازاى ربنا يسبهم يعملو كده من غير ما يعرفهم الصح اشمعنا المسلمين الى على طول بيردو وحتى الى مابيعرفش حاجه بيقعد يدور على الرد يعنى هو ربنا معاهم ولا معانا وبعدين قرات مناظره مع شيخ مع واحده مسيحيه كل الى عمله انه طلب منها انها تعرفه على طايفتها وهى رافضه تجاوب طيب ليه هي مكسوفه تقول طيب مانا لما سالت صاحبى انت تبع اى طايفه فى دينكم قالى احنا اهل السنه وماتكسفش يقولها وحاجات من كده كتير وحكايه الكلام الى موجود فى كتابنا ازاى انه كلام ربنا وحتى مهما كان ليه تفسير ازاى يبقى بالسفاله دى وحتى فى كلام باين قوى انه مش كلام ربنا زى الى بيقول انه هيالف قصه المسيح حتى لو كانت معاه الروح القدس برده ده كلامه مش كلام ربنا لان ربنا عمره ماهيقول اننا شوفت ان فيه ناس الفت فقمت الفت انا كمان يبقى الكلام برده مش راكب فاخذت فرصه مع نفسى افكر كويس فى الى انا بشوفه وسيطرت عليا حاله من القلق والعياط ان ازاى ممكن نكون احنا الغلط وهما الصح وكنت كل شوىه ادعى واصلى ان ربنا يورينى الصح و المهم بعد صراع طويل مع نفسى كان عقلى هينفجر فى النهايه قلت مستحيل كلامنا ده يكون بتاع ربنا و قررت اسلم ورحت طالع لصاحبى ولما شافنى ضحك وقالى ايه يبنى فينك هو انا كل ماسال عليك الاقاك مش موجود ايه عمال تدور كل ده على الموس فقلتله عايزك فى حاجه مهمه قالى خير قلتله انا قررت اسلم قالى بجد ولا بتهزر قلتله بجد قالى معقول اخيرا وحضنى وفرح قوى قلتله انا عاوز ادخل الاسلام قالى حاجه سهله قوى تشهد الشهاده وتروح تستحمى وبعدين قالى انا مش عاوز حد يعرف انك اسلمت دلوقى قلتله انا ما يهمنيش وبعدين ما تصدقش حكايه انهم بيقتلو الى بيسلم دى علشان انت عارف ان فيه ناس اسلمو واحنا شايفينهم عايشين عادى وما حدش جه جنبهم قالى وانا بقولك علشان كده بس يبنى ازاى واحد لسه قايم من المرض ويقوم يطلع يجرى على طول مش لازم ياخذ فترة نقاهه الاول وبعدين علشان حتى ماتزعلش امك وابوك دلوقتى وربنا يسهل لما القى الوقت مناسب هاقولك اعلنها دلوقت بس ربنا يسهل عايزك تتعلم اهم حاجه ازاى تتوضا وتصلى زى وبعدين طلعتله وقلتله انا جاهز قالى بص اعمل زى مانا هاعمل وقول زى مانا هاقول بالظبط وبعد ما توضينا و صلينا قعد يحفظنى الفاتحه وبالظبط اخذت منى حوالى ساعه حفظ وسمعتهاله فقالى شوفت قرانا سهل ازاى وربنا يسهل كمان كام شهر هاخليك تحفظ كذا جزء من القران لغايه ماتحفظه كله وتبقى زى ونسمع لبعض علشان ما يبقاش حد احسن من حد والله من ساعتها لما بسمع القران بحبه اقوى بالرغم ان فيه حاجات كتير مابفهمهاش الا انى مابقتشى كارهه وبعدين قالى بس فيه حاجه مهمه لازم تروح تشكر صاحب الرد بتاع سوالك علشان تحسسه ان تعبه جاب فايده فدخلت لو حد لاحظ باسم البورسعيدى وبعدين خرجت على طول وقلتله انا عاوز ادخل باسم غير ده فقالى خذ الاسم الى انا دخلت بيه على منتداكم قلتله طيب وانت هاتدخل بايه قالى اصلا ده مش اسمى اناكنت عامله بس علشان اوريلك وبعدين انا عضو اصلا فى المنتدى امال انا ليه قلتلك حط السوال هنا
واطلب من كل الى يقرا قصتى انه يدعي لى بهدايه اهلى كلهم لانى خايف ان حد فيهم يموت وهو كده
والصور الى بتاكد الكلام بتاعى موجوده فى المرفقات علشان الى عاوز يتاكد وممكن تكتبو اسم الموضوعات على الجوجل وانتم تشفوها بنفسكم وربنا يهدى الجميع
لااله الا الله محمد رسول الله
رد مع اقتباس
المشاركة الأصلية كتبت بواسطة freemanmuslem
المفضلات