هذه قصيدة لاحد شعراء العراق تبين حالة الميت


شلون بيه وثقل وزن احسابي
وانملى مني المعاصي كتابي

شلون بيه لو قرب مني الأجل
واخذ سمعي الموت ولساني انكتم

وظلت عيوني تدير على الاهل
تشوفها تهل الدمع لمصابي

شلون بي النفس لو مني كمت
ومني ملك الموت اخذ روحي وصعد

للمغيسل طلعو مني الجسد
وقام غسالي يجرد ثيابي

شلون بي الكفن لو لفوني
للقبر بعد الغسل شالوني

ونزلوني بحفرتي واروني
وقام دفاني يهيل ترابي

شلون بي لو مسيت بحفرتي
بدار غربة وبس احاتي غربتي

لا عمل ويلي ويرد وحشتي
وابعدو عني هلي وصحابي

شلون منكر لو لفاني للقبر
وقام ينشد بيش قضيت العمر

شنهو ذاك الوقت من عنده عذر
شنهو عن ذيك لمعاصي جوابي

شلون بي من ترد ليّ اعمالي
والذنوب تصير كلها اقبالي

وادري منكر ما يروق بحالي
وهذا حكم الله عليّ حسابي

شلون بي لو قضب جسمي القبر
وقام من خشمي حليب امي يذب

شلون بي لو وقفت يوم الحساب
شايل ذنوبي وقدامي الكتاب

شنهو عذري وشعطي للباري الجواب
وان يعاتبني ويزيد عتابي

شلون بي من التفت يسرى ويميني
يوم هذا يشيب عند الجنين

مال لا ينفع ولا ينفع بنينن
ولا ندم ينفع وعقب انجازي

ـــــــــــــــــــــــــــــــــــــــــــــــــــ
اللهم نعوذ بك من فتنة المحياة والممات ونعوذ بك من عذاب القبر وعذاب جهنم
اللهم لاملجأ ومنجى منك الا اليك فاسترنا فوق الارض وتحت الارض ويوم العرض عليك

أشهد أن لا اله الا الله واشهد أن محمد عبده ورسوله

معاذ