أخي الفاضل kmheer

أشكرك على هذا الموضوع القيم

أنا كتبت قبل كده في أحد المنتديات للرد عليهم فيما يقولوه بخصوص الرئيس حسني مبارك ووللأسف رد عليا المشرف العام هناك بردود صعبة جدا ولبيان صعوبتها أقول ان أمريكا اذا سمعتها هتفرح جدا بما أنجزته في هذا الموضوع

واسمحولي أنقل ليكم ردي لمعرفة رأيي في هذا الموضوع

كان عنوان الموضوع :الأزهر يتلقى تعليمات لبدء حملة لصالح مبارك


أنا ليا رأي مخالف ليكم يا شباب

ولايصال وجهة نظري هسألكم سؤال

هل الأفضل أن يساند الأزهر الشريف بثقله الديني واحترامه بيننا في دعم الرئيس مبارك أم نترك البلد تشتعل لصالح أمريكا؟

على فكرة أنا مش بتابع موضوع الانتخابات المنتظرة دي لكن سمعت عن الدوشة اللي عاملها اللي اسمه أيمن نور وعن حركة كفاية

وبصراحة اندهشت من حاجة

عرفت ان أيمن نور اتحبس وبعدين تدخلت أمريكا وأفرج عنه وخرج ليستكمل ما بدأه

سؤال: ايه اللي يخللي بلد زي أمريكا تتدخل لصالح واحد زي أيمن نور؟

ايه هو هدفها من دعم مواطن مصري المفروض انه مواطن عادي؟

وايه هي العلاقة اللي بتربط بين أيمن نور وأمريكا؟

وهدف العلاقة دي ايه؟

عايزين يوصلوا لايه؟

أكيد هدف غير شريف

وعايزين يستخدموا واحد زي أيمن نور عمالين ينفخوا فيه وينقلوه زي قطعة الشطرنج لتحقيق مآربهم ضد مصر واضعافها

عايزين البلد تشتعل

وعندئذ تتدخل ماما أمريكا الرحيمة علشان تنقذ البلد

انتم عايزينا نتحول الى فريسة لهم زي ماهو حاصل لأخواننا بالعراق؟

ماهو يا جماعة هما بيعملوا مع أيمن نور زي ما عملوا مع صدام حسين وفي الآخر هيلفظوه عند انتهاء دوره على مسرح الأحداث

حتى اذا ليكم اعتراضات على الرئيس مبارك وده شيء طبيعي لأن الكمال لله وحده وكل حكم في الدنيا كلها ليه سلبياته

بقول حتى برغم الاعتراضات لكن أكيد لا يرضيكم أن يكون اضرام نار هذه الاعتراضات بيد أمريكا والمفروض اننا نتمسك برئيسنا حتى نرد كيدهم في نحورهم

يا جماعة رئيسنا عمره تعدى السبعين وربنا يطول في عمره لكن يعني مش هيعيش قد ما عاش يبقى ليه بقى مانسيبشي الأمور تمشي في مسارها الطبيعي وبعدين الراجل ليه حسنات وانجازات كتير ليه بتشوفوا المساويء فقط؟

وسؤال أخير اذا مش عاجبكم الرئيس مبارك مين بقى اللي شايفين انه جدير بأن يحل محله؟

أيمن نور؟

برجاء الافادة والرد على تساؤلاتي من غير اندفاع الشباب والرغبة في الانتصار للرأي فقط

ــــــــــــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــــــــــــ ـــــــــــــــــــــــ
بعد عرض ما سبق أقول :

ربنا يحمي بلدنا وينصرها على أعداء الخارج والداخل