عم رمضان
وليه تكمل بكرة ما تكمل دلوقت ولا عاوز تخليلها ديل
الشيخ حسن
يمكن يكون وراك مصلحة ولا حاجة حتعملها وانا معطلك
عم رمضان
لأ يا سيدى ما واريش حاجة
وبعدين إنت حتروح تعمل إيه دلوقت ؟
آدِيك قاعد معايا بدل ماتروح تقعد بوزك فى بوز حلاتهم
الشيخ حسن
حلاوتهم بتسلم لوحاتها من بدرى وزمان شخيرها دلوقت جايب لآخر الدنيا
عم رمضان
ما تعمللها الشحمية وتريح دماغك
الشيخ حسن
إسمها اللحمية يا شيخ رمضان
الشحمية دى بتاعة الودن إنما اللحمية بتاعة الأنف
عم رمضان
شحمية لحمية المهم تشوف إيه إللى واقفلها فى سكة الهوا ، أكيد عندها سدد فى حته معينة
الشيخ حسن
قلتلها كذا مرة تعالى نروح نكشف علشان ماباعرفش أنام منك بالليل الشخير بتاعك طرشنى تقوللى أنا باشخر من التعب وساعات تقوللى الحريم كلاتهم كده
وأخر ماغلبت بقيت أسد ودانى بالشمع
عم رمضان
خلاص حناكل لقمة مع بعض وبعدين تكمل كلامك عقبال م الشاى يتعمل
وكمان ياسيدى حااعملك شاى فتله علشان تنبسط
الشيخ حسن
أخيراً عملتها وإشتريت شاى فتله ؟
عم رمضان
يا شيخ دول فتلتين أخدتهم من الحاج شرقاى لما كنت عنده ليلة امبارح
الشيخ حسن
كلام إيه ده ؟
عم رمضان
زى ما باأقلك كده كنت عنده ليلة امبارح وقاللى إنه إشترى علبة شاى ليبتون فتله
قال إيه الشاى المغلى قطع نفسه ولقى إن الشاى الفتله بيريحه
بس كان حيطير من الفرحة وهو بيكلمنى
الشيخ حسن
يبقى بكره أخطف رجلى واروح أباركله
أحسن يزعل منى يقول عرف ولا جاش
عم رمضان
واجب برضو
ياأخى والله ده انت داهيه مسيحه كل حاجة تاخدها بالهزار
مش عارف لو جرالك حاجة حااعمل إيه من بعدك
الشيخ حسن
ياعالم مين إللى حيسبق الأول
أم السعد
يا شيخ رمضان
يا شيخ رمضان
عم رمضان
أهى أم السعد جهزت الأكل لما أأقوم أجيبه
الشيخ حسن
حاسب عاالشُوربَه وانت جاى
عم رمضان
وايش عرفك إن فيه شُربَه ؟
الشيخ حسن
إهيه مانا شامم ريحة الزفر من بدرى
عم رمضان
أهو يا سيدى جبتلك شوربة مع الأكل وقلت لام السعد تعمللنا كوبيتين شاى فتله بعد ما نخلص
يالا مد إيدك بسٌملهَ
الشيخ حسن
بسم الله الرحمن الرحيم
يتبع بمشيئة الله