........ ربنا يصبرك ........
بسم الله الرحمن الرحيم والصلاة والسلام على اشرف المرسلين سيدنا محمد :salla: وعلى اله وصحبه اجمعين اما بعد :
عايزين نتناقش فى موضوع مهم جدا وهو العصبية وكيف تتمالك اعصابك .....
يعنى مثلا نزلت من بيتك لابس اللى على الحبل ورايح مشوار مهم (هتقدم فى شركة مثلا) وفجأة تلاقى البنطلون والقميص بينشعوا ميه وقبل ما تفهم فى ايه تلاقى صبى القهوة بيقولك مش تفتح يا ------ انت اتعميت يا ------ مش شايفنى برش مية قدام القهوة
وطبعا لازم تعتذر له بدل ما يلبسك قضية تعدى على صبى قهوة اثناء تأدية عمله.....
تطلع تغير هدومك وتنزل( ومعاك الشمسية المرة دى ) وتبدأ رحلة العذاب
لو معاك عربية استحمل بقى انت اللى جبته لنفسك
اولا اوعى تتضايق من الميكروباصات اللى هتكسر عليك فى كل وقت وكل مكان وطبعا متستناش حاجة اسمها اشارة دى اتلغت من زماااان, يعنى تحمد ربنا وتبوس ايديك دقن وشعر لو الراجل طلّع ايده قبل ما يكسر عليك
واوعى تتضايق من الناس اللى هتطلعلك من تحت الارض بتعدى الشارع وبما فيهم الاطفال (خلاص محدش بقى يخاف من العربيات ) وطبعا هتسمع كلام كتير عن جنون السرعة والدنيا اللى خلاص هتطير وان ارواح الناس بقت لعبة ( كل دا وانت ماشى على 60)
ولو مكانش عندك عربية يبقى تقعد فى بيتك احسن انت عارف كويس ايه اللى هيحصل
اولا معركة الركوب (اللى معركة عين جالوت بالنسبة ليها لعبة بلاى ستيشن ) وازاى تقدر تركب بأقل الخسائر والمفقودات
ونصيحة لوجه الله لو لاقيت واحدة ست واقفة اوعى تحاول تركب قبلها ...... ولو حاولت ولاقيت نفسك بتتشد لورا وهيا بتركب وبعدين تبتتدى تتكلم عن قلة الادب وانعدام الضمير وهيفاء ونانسى عجرم ودورهم القوى فى افساد الاخلاق فأوعى تتنرفز او تحاول تعترض ( مفيش حد هيصدق وكلهم هيتعاطفوا معاها ) وساعتها بقى لازم تكون بطل مصر فى الاعتذار وبوس الراس
ولما ربنا يكرمك وتركب حاول بقى تغمض عينيك على قد ما تقدر وبلاش تركب جنب السواق لان ركوب قطار الموت بتاع دريم بارك ارحم مليون مرة من ركوب الميكروباص
ولو وصلت بالسلامة فى حاجة مهمة لازم تعرفها ... اوعى تسأل حد عن مكان الحتة اللى انت رايحها ولو سألت ومشيت ورا الوصفات بتاعت الناس متستغربش لما تلاقى نفسك قدام بيتكم او تلاقى يافطة مكتوب عليها 100 كيلو على نهاية الارض
ولو عرفت توصل الشركة ولاقيتهم قفلوا والراجل قالك تعالى بكره ان شاء الله ........ اوعى تفقد روحك المعنوية لأنك محتاجها جدا فى رحلة العودة
واخيرا لما ترجع بيتك وتحضر فنجان قهوة وتدخل على المنتدى تلاقى واحد نصرانى بيحاول يقنعك بان الرب 3*1..........................
الصراحة مش عارف اقولك ايه............ ربنا يصبرك
تذكروا دائـــــــــما قول الله تعالى :
(((وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَوَاتُ وَالْأَرْضُ أُعِدَّتْ لِلْمُتَّقِينَ (133) الَّذِينَ يُنْفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ (134) وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلَّا اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ (135) أُولَئِكَ جَزَاؤُهُمْ مَغْفِرَةٌ مِنْ رَبِّهِمْ وَجَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ (136) )))
