أهلا بأخواتى الغاليات

بجد مفيده جدا مش هاتندموا

ألأكلة الأولى
****************

**سد الحنك** **
*********************
سمعتوا عنها أنا ياما كلتها وأنا صغيره وكانت اخر مرة هههه

المكونات

كوب لبن - كوب إلا ربع دقيق - معلقة سمن أو زيت - معلقتين سكر

الطريقة
نقدح السمن أو الزيت فى طاسة
يوضع الدقيق ونقلب جيدا حتى يبدأ لونه فى التغير
ثم نضع السكر ونقلب قليلا
يوضع اللبن بالتدريج مع التقليب المستمر
تهدأ النار ونستمر فى التقليب
هاتلاقى عندك عجينة حطيها فى قالب رشى عليها سكر بودرة
وممكن تحطى منها بإستخدام بولة الآيس كريم فى كاسات
وبالهنا والشفا

إيييييييه رأيكم حاجه سهله خالص



الأكلة الثانية

**************

**الفايش**

سمعتوا عنها دى كمان
دى عباره عن قراقيش تنفع للفطار أو العشا

المكونات
دقيق أبيض
حمص مطحون أو عدس أصفر مطحون ناعم جدا
لبن
سمن أو زبده
قشطة
ماء
سكر
كركم

الطريقة
المرحلة الأولى
نغلى كوب من اللبن
نحضر برطمان زجاجى نحط فيه معلقة حمص أو عدس ناعم ونصب عليها اللبن المغلى مع معلقتين صغيرين سكر ونقلب جيدا نقفل البرطمان بإحكام ونضعه فى مكان دافىء لمدة 15 ساعه تقريبا

المرحلة الثانيه
نحضر كوب دقيق ونضع عليه اللبن المتخمر إللى فى المرحلة الأولى مع 3 ملاعق صغيرة سكر
نعجن جيدا الخليط مع بعضه ثم نغطيه ونتركه ليتخمر

المرحلة الثالثة
نحضر كيلو دقيق ونضعه مع المرحلة الثانية بعد تخمرها مع معلقتين صغيرين سكر ونعجن بماء دافىء حتى تصبح عجينة متجانسة ومتماسكة ونتركها أيضا للتخمر

المرحلة الأخيرة
نحضر 5 كيلو دقيق وقليل من الماء الدافىء مع معلقتين أو ثلاثة صغيرين سكرمع سمن أو قشطة أو زبدة وممكن نصف الكمية قشطة والنصف الآخر زبدة مع معلقة صغيرة كركم نبدأ نعجن المكونات ثم نخلطها مع عجينة المرحلة الثالثة ونعجن جيدا حتى تتكون عجينة مثل عجينة البيتزا مش ناشفه ومش لينه
ثم تفرد العجينة فى الصوانى وتقطع بالطول ثم نتركها فى مكان دافىء ويفضل أن يكون مشمس حتى تتخمر
يتم خبز الصوانى فى فرن حار حتى يحمر الوجه ثم تقسم الشرائح الطولية إلى وحدات صغيرة بالسكين ويعاد مرة أخرى للفرن بعد أن تهدأ الحرارة حتى تصبح مقرمشة

إيييييييه رأيكم
بجد بجد لذيذه جدا وطعمها تحفة
جربوها مش هاتندموا


الأكلة الثالثة

**********


المفتقة

طبعا إللى بيعمل رجيم يبعد عنها
شوفوها وقولولى رأيكم

المكونات
كيلو عسل اسود
نصف كوب حلبة مطحونة طحن ناعم جدا
2 ملعقة كبيرة دقيق
كوب صغير زيت عادى ويفضل زيت نقى
نصف كوب سمسم محمص
كوب سودانى مكسر فقط

الطريقة
ضعي العسل في وعاء و ضعيه علي النار حتي تظهر فقاقيع طبعا مع التقليب
ولا تتركية يغلى واحترسى من طرطشة الفقاقيع ويفضل عدم وجود اطفال بالمطبخ
احضري الحلبة المطحونة و ضعيها علي العسل وقلبيهم جيدا ليمتزجوا وضعيها على النار مرة اخرى
بمجرد ظهور الفقاقيع ابعدى الوعاء عن النار بسرعة لان كثرة الغليان يمررها وينشفها
في اناء اخر ضعي الزيت مع الدقيق وقلبيهم ليصبح لونة اشقر فاتح ثم ضعي السمسم والسوداني حتى يتغير لونهم ايضا
لا تحمريهم كثيرا في الزيت
ضعي خليط الزيت والدقيق و السمسم و السوداني علي خليط العسل وقلبيهم جيدا جدا
و اتركي الحلبة المعقودة لتبرد
احضرى برطمانات زجاجية وعقميهم على هبو النار واتركيهم ينشفوا حتى لاتفسد المفتقة وصبيها فى البرطمانات


الأكله الرابعة
************

فول مدمس مطبوخ
*****************************
النهارده جايبه لكم أكله خفيفه مش حلويات تنفع فطار محترم أو عشا لذيذ
وإن خلص الفول أنا مش مسؤول


المكونات

2 كوب فول مدمس
بصلة مقطعة قطع صغيرة
2 طماطم مفرومة أو مبشوره
حزمة بقدونس مفروم ناعم
ملح وملعقة صغيرة كمون
ملعقة صغيرة كسبرة ناشفة
ملعقتين كبار زيت
قطعةزبدة
3 بيضات أو حسب عدد الأفراد

طريقة التحضير:

يحمر البصل فى صينية فى الزيت حتى يصفر لونه
ثم نضع عليه الطماطم ويترك لمدة 5 دقائق
ثم نضع عليه الفول المدمس ويترك 10 دقائق
ثم نضع التوابل وقطعة الزبده ثم يرفع من على النار
ونقوم بعمل حفره ونكسر البيضه ونضعها فيها ثم الثانيه وهكذا
ونضع الصينيه داخل الفرن الحار 5 دقائق ثم نخرج الصينيه ونرش عليه البقدونس ونغطيها قليلا وتقدم ساخنه

وبالهنا والشفا

بجد طعمه تحفه ولذيذ جدا جدا جربوه وقولولى
بس اقول لكم على سر محدش يفتن عليه
(ملطوش)هوس ولاكلمه ؟؟؟
منتظره رايكم هههههه