بسم الله

و الحمد لله

و الصلاة و السلام على رسول الله

على بيسلم يا جماعه سلموا

على رجع المنتدى ضلمه

جاى لكوا بحكاية من الخيال

تأليفي أنا على جلال

يا جماعه خيال مش حقيقه

فهاتوا من وقتكوا كذا دقيقه

و فوقوا بقى و صحصحوا معايا

و يلا بقى اقرءوا الحكاية

...................

السلام عليكم..أهلا يا جماعة

هحكى حكاية فاسمعوا الكلام

علشان أصلى الصبح جماعه

ظبطت المنبه قبل ما انام

و قبل الفجر ما ييجى بساعة

ضرب الساعة أربعة(4)تمام

اتخضيت من صوته خضه

قعدت بعدها متضايق

غلبت الشيطان و قومت أتوضه

لقيت نفسى بعدها رايق

إتوضيت و الوضوء عباده

و قوام فردت السجاده

و صليت وتر بعد القيام

و حمدت ربى على الاسلام

و طلبت طلبات كتير

ما هو انا فى الثلث الأخير

مش كده بس ..لأ و كمان

قعدت شوية أقرأ قرآن

بأحكامه كلها و منها الغنه

و فجأه سمعت صوت الأدان

أنزل الجامع أصلى السنة؟

و لا فى البت هى كمان؟

هى ثوابها فى البيت أكبر

بس بصراحة خفت أتأخر

صحيت اللى عندى فى البيت

و قوام ع الباب جريت

فتحت الباب

جالى اكتئاب

ماشى لوحدى و السلم ضلمه

قوموا صلوا يا ناس يا ظلمه

اول ما خرجت م العماره

قابلنى واحد بسجاره

بص لى من فوق ل تحت

و قال لى لو سمحت

عايز منك كبريت

قولت بسيبه فى البيت

قال لى طب هات ولاعه

قلت له بص فى الساعه

ده معاد صلاه تعالى صلى

الجامع قريب..هنا..قُدام

سمعنى بقول له صلى قال لى

عليه الصلاة و السلام

و كان هيمشى قلت استنى

و كلمته عن النار و الجنه

..الراجل خاف من العذاب

و حب الجنة فاستجاب

حسيت بنشاطى اتجدد

و خدته من ايده ع المسجد

لقيت واحد صاحبى فى بلكونته

شكله اتضايق لما شفته

هو ساكن فوق الجامع لزق

قلت له انزل فقال لى لأ

قولت لصاحبنا اللى اهتدى

انهارده عمرك ابتدى

و لو سمحت سيبنا لوحدنا

و اسبقنى انت و اتوضه

و متنساش تقول لربنا

و عجلت إليك ربي لترضى

استجاب و راح فى ثوانى

فبصيت لصاحبنا التانى

قولت له الشيطان بيغويك

قال صلى ع اللى هيشفع فيك

و من الآخر متضايقنيش

و لسه ربنا مهدانيش

قلت له ربنا هيهديك

بس انت حاول تتوب

قال لى ربنا يديك

و يصلح بيك القلوب

و متوجعش دماغى و دماغك

و ابقى خدنى على جناحك

و انا هبقى اصلى بعد ساعه

قلت لأ لازم فى جماعه

قعد يعيد لى و يزيد لى

و مبرراته أى كلام

مره يقول لى كاللوا فى رجلى

و مره تعويره فى الابهام

و قال لى طب ايه يضر

لو صليت قبل الظهر

قولت له لأ هنا بقى و حاسب

صلاة الجماعه شىء واجب

و مينفعش بعد شروق الشمس

فانزل بقى و بطل هلس

قال لى من الاخر انا حر

و الصبح معاده لحد الظهر

قولت له طب فين أخوك

قال بيصلى بعد الشروق

مشيت و انا بضرب كف على كف

الناس خلاااص عقلها خف

كنت من البرد هتجمد

و انا واقف بتكلم معاه

المهم دخلت المسجد

و على طول أقيمت الصلاه

يوووووه...فاتتنى السنه

ما احنا قبل كده قولنا

نصلى على طول فى البيت

بس برضه وقتها حسيت

ان انا برضه كسبان

ربنا هدى بيا إنسان

صليت و جنبى اتنين

تلاته بس ورا الامام

صلى بينا الركتين

و حصل مشكله بعد الختام

انا بعد ما بعدت بعيد

و استغفرت ربنا على ذنبى

راح صاحبنا الجديد

يسلم ع اللى صلى جنبى

قال له اتق الله يا مبتدع

ياللى بسلام بعد الصلاه منخدع

قال له هو السلام بقى ذنب

قال له أيوه و مرض قلب

رحت له و قلت له براحه

الراجل ميعرفش..ده لسه جديد!!

قال من الاخر كده وبصراحه

انت باين عليك مبتدع أكيد

بتشجعه ع الفسق و الفجور؟؟

..كلامه خلى دمى يفور

و مسكت نفسى بقدر امكانى

و صاحبنا قال مش جاى هنا تانى

و أخينا التانى ده مطنشه

مع إن هو اللى طفشه

فكلمت أخينا بكل هدوء

و سألته عن حكم فى الوضوء

فجأه لقيته سكت و مبلم

أنا قلت يا سلام سلم

بقى عامل فيها علامه

و انت مش عارف تتوضه

قال لى اخرج من هنا بالسلامه

..طردنى شر طرده

قلت انا قاعد للشروق

قال لى اخرج من هنا بالذوق

عملت نفسى مش سامع

فجأه لقيت أخوه بيندهله

أتارى العماره اللى فيها الجامع

بتاعة حد من أهله

خرجت و أنا بهرش فى دماغى

و حاسس انى كده مش متفائل

منهج الوسطيه بقى لاغى

ده متشدد و ده متساهل

بقى ينفع نحرق دمنا

و كل يوم نسأل بعض

البركه ليه راحت مننا؟

ده احنا بنفوت فى كل فرض!!

يا جماعه من رحمة ربنا

انه مخسفش بينا الأرض



....سبحان الله و بحمده ، سبحانك اللهم و بحمدك ، أشهد أن لا إله إلا أنت أستغفرك و أتوب إليك.