صينية الرقاق باللحمة المفرومة
أولاً وبعد الصلاة والسلام على الحبيب المصطفى صلى الله عليه وسلم
أقدم اليوم أكلة لطالما أحبها الكثير منا وهى سريعة وسهلة الإعداد فى نفس الوقت .. وهى صينية الرقاق باللحمة المفرومة
وهذه الصينية أو الأكلة أرتبطت أرتباط وثيق بالعيد الكبير حيث تتوفر فيه اللحمة الضانى.
ولكن الكثير منا يفضلها على مدار العام
وأنا عن نفسى ساقدم لكم طريقة عملها ومقاديرها (هى وغيرها من مختلف المأكولات) ليس نقلاً عن مواقع للمأكولات أو كتب أو غيره ولكن ....من خلاصة تجاربى الشخصية مُنذ سنين...
فأرجو أن تحوز على أعجابكم وقبولكم
صينية الرقاق باللحمة المفرومة
اول حاجه نجيب رقاق طرى من عند اى فطاطرى
ونستعمله فورا قبل ما ينشف
يكون عندنا شوربة دسمة من لحم ضانى ( او كندوز )
وطبعاً لحم معصج بالملح والفلفل
و ندهن صينية الفرن بالسمن ونفرد رقاقه ونشيل البواقى
و نحط عليها معلقتين شوربة ونحط الرقاقة التانية
ونفرد شوية عصاج خفيف
و نعيد تانى رقاقتين بينهم شوربه ثم عصاج
ونكرر لغاية تخانة حوالى صباعين ( 3 سم تقريبا )
ونختم اخر رقاقه عليها معلقتين سمن (ويُفضل سمن بلدى)
ونخرط الصينية مربعات بسكين حاد علشان ما نلخبطش الرقاق
بعد كده عالفرن الحامى لغاية السوى وبدء إحمرار الوش
نطلع الصينية ونكون مجهزين كوباية لبن مضروب فيها صفار بيضتين
وندلقها على وش الصينية وتدخل الفرن تانى للتحمير النهائى
ثم تُقطع إلى مثلثات تتقابل رؤسها فى مركز الصينية بسكين التقطيع الخاصة والحادة فى نفس الوقت.
وتٌقدم فى طبق بلور وتزوق بالبقدونس المفروم ناعم جداً على وجهها
وإن العين تأكل قبل الفم أحياناً
ويا سلام عليها جنب حته ضانى مستويه
وحذارى من شُرب الشاى بعد الاكل مباشرة (على الاقل ساعتين)
وألف هناااااااااااااااااااااا و شفاااااااااااااااا
